Архив

Үр дүн : 521

  • Монгол Улсын Ерөнхийлөгч Х.Баттулга: Хүнс, хүнсний ногоогоо дотооддоо үйлдвэрлэж, дотоодын хэрэгцээгээ хангах нь аюулгүй байдлын бодлоготой уялдах ёстой

    2017-09-23

    Монгол Улсын Ерөнхийлөгч Х.Баттулга хүнсний хэрэглээгээ дотоодоосоо 100 хувь хангадаг болох зорилт дэвшүүлж, Ерөнхийлөгчийн санаачилгаар энэ 9 дүгээр сарын 12-ны өдөр Хүнсний аюулгүй байдлын үндэсний чуулганыг зохион байгуулсан билээ.

    Монгол Улсын Ерөнхийлөгч Х.Баттулга өнөөдөр Мишээл экспо төвд “Эрүүл хүнс-Эрүүл монгол хүн” уриан дор зохион байгуулагдаж буй “Намрын ногоон өдрүүд” үзэсгэлэн худалдаанд зочилж, үндэсний хүнс үйлдвэрлэгчдийнхээ бүтээгдэхүүнийг үзэж сонирхон, нийслэлчүүддээ дотоодынхоо хүнс, төмс, хүнсний ногоо, зөгийн бал, жимс жимсгэнийг хэрэглэхийг уриалж худалдан авалт хийсэн юм.

    Төрийн тэргүүн “Хос ивээл” компанийн хиам, боловсруулсан махан бүтээгдэхүүн, “Мөрөн хүнс” компанийн даршилсан ногоо, үхрийн хатааж нунтагласан мах, Төв аймгийн Зуунмод сумын “Атрын шим” компанийн хүнсний ногоо, Хөвсгөлийн “Их тайга” компанийн эмийн ургамлаар үйлдвэрлэсэн цай, эрүүл мэндийн цуврал бүтээгдэхүүн, “Топиус” компанийн эмийн ургамлын бэлдмэлүүд, “Өв сүү” хоршооны цагаан идээ, нийслэлийн зарим иргэдийн хашаандаа ургуулж буй хүнсний ногоо, Говь-Алтай аймгийн Есөнбулаг сумын иргэн П.Дашбазарын сур элдэж хийсэн хазаар, ногт, суран эдлэл зэрэг олон үйлдвэрлэгчдийн хийж бүтээсэн, ургуулж тариалсан, малын ашиг шимээс гарган авсан бүтээгдэхүүнүүдтэй танилцсан юм.

    Дэлгэрэнгүй
  • Монгол Улсын Ерөнхийлөгч Х.Баттулгад БНЧУ-ын Элчин сайд ИЖБ барив

    2017-09-22

    Монгол Улсын Ерөнхийлөгч Х.Баттулгад Бүгд Найрамдах Чех Улс /БНЧУ/-аас Монгол Улсад суух Онц бөгөөд Бүрэн эрхт Элчин сайд Иржи Бродский өнөөдөр Итгэмжлэх жуух бичиг барив.

    Элчин сайд Иржи Бродский Монгол Улс, БНЧУ эртний уламжлалт найрсаг харилцаатай гээд үүний илэрхийлэл нь чех хэлтэй 50 мянган монгол хүн байдаг, Монголоос олон хүн тус улсад ажиллаж амьдардаг гэлээ.

    Тэрээр Элчин сайдын хувьд хоёр орны харилцааг өргөжүүлэн гүнзгийрүүлэх, үүний дотор худалдаа, эдийн засгийн харилцааг ашигтай хэлбэрээр хөгжүүлэх нь чухал гэдгийг онцоллоо.

    Монгол Улсын Ерөнхийлөгч Х.Баттулга үүнтэй санал нэг байгаагаа илэрхийлээд “Хоёр орны хооронд худалдааны эргэлт бага байгаа. Монгол Улс Зүүн Азитай ойр хөрш оршдог. Зүүн Ази бол дэлхийн эдийн засгийн 30 хувийг бүрдүүлдэг. Дэлхийн хүн амын тал хувь нь Ази тивд бий. Иймээс Чехийн эдийн засаг, бизнесийг Зүүн Азитай холбоход Монгол Улс дамжин өнгөрөх гүүр  болж чадна.

    Дэлгэрэнгүй
  • Монгол Улсын Ерөнхийлөгч Х.Баттулга Конрад Аденауэрийн сангийн Монгол дахь суурин төлөөлөгчийг хүлээн авч уулзлаа

    2017-09-21

    Монгол Улсын Ерөнхийлөгч Х.Баттулга Конрад Аденауэрийн сангийн Монгол дахь суурин төлөөлөгч Даниэль Шмүкингийг өнөөдөр хүлээн авч уулзлаа.

    Уулзалтын үеэр засаглалыг тогтвортой байлгах чиглэлд талууд аль аль нь санал нэгтэй байгаа талаараа санал солилцож ярилцав.

    Дэлгэрэнгүй
  • Монгол Улсын Ерөнхийлөгч Х.Баттулга Азийн хөгжлийн банкны суурин төлөөлөгчийг хүлээн авч уулзав

    2017-09-21

    Монгол Улсын Ерөнхийлөгч Х.Баттулга өнөөдөр Азийн хөгжлийн банкны Монгол дахь суурин төлөөлөгч Ёланда Фернандез Ломмэнийг хүлээн авч уулзав.

    Хатагтай Ёланда Фернандез Ломмэн 2016 оноос Монгол дахь суурин төлөөлөгчөөр ажиллаж байгаа бөгөөд 2001 оноос Монгол Улстай холбоотой ажилласан. 2001 оноос хойш Монгол асар хурдацтай хөгжиж буйг тэмдэглэв. Мөн өмнөх суурин төлөөлөгчидтэй Монгол Улсын Ерөнхийлөгч Х.Баттулга УИХ-ын гишүүн болон Засгийн газрын гишүүн байхдаа үр дүнтэй хамтран ажилладаг байсан гэдгийг тэмдэглэлээ.

    Азийн хөгжлийн банк нь Монгол Улстай хамтран ажиллах шинэ стратеги боловсруулж байгаа юм байна. Уг стратеги нь хэд хэдэн тэргүүлэх чиглэлтэй бөгөөд эдийн засгийг төрөлжүүлэх, ажлын байрыг олноор нэмэгдүүлэх, төрийн үйлчилгээг иргэдэд илүү үр дүнтэй хүргэх зэрэгт нэн түрүүнд анхаарч буйг Азийн хөгжлийн банкны Монгол дахь суурин төлөөлөгч Ёланда Фернандез Ломмэн хэллээ.

    Дэлгэрэнгүй
  • Монгол Улсын Ерөнхийлөгч Х.Баттулга Бүгд Найрамдах Итали Улсын Элчин сайдыг хүлээн авч уулзлаа

    2017-09-21

    Монгол Улсын Ерөнхийлөгч Х.Баттулга өнөөдөр Бүгд Найрамдах Итали Улсаас Монгол Улсад суугаа Онц бөгөөд Бүрэн эрхт Элчин сайд Андрэа Де Фелипийг хүлээн авч уулзлаа.

    Уулзалтын үеэр Монгол Улсын Ерөнхийлөгч Х.Баттулга арьс ширний үйлдвэрлэл, хүнс, экологийн цэвэр бүтээгдэхүүнийг Итали төдийгүй Европын холбооны зах зээлд гаргах талаар хоёр тал хамтран ажиллах сонирхолтой байгааг илэрхийлэв.

    Ингэхийн тулд Италийн дэвшилтэт техник, технологийг Монголын түүхий эдтэй хослуулан эцсийн бүтээгдэхүүн үйлдвэрлэж, гуравдагч зах зээл, ялангуяа Европын Холбооны зах зээлд гаргахаар хоёр тал өмнө нь тохирсон. Үүнийг ажил хэрэг болгоход Элчин сайдтай хамтран ажиллаж, бүх талын туслалцаа үзүүлэхэд бэлэн байна гэдгийг тэмдэглэсэн юм.

    Дэлгэрэнгүй
  • Монгол Улсын Ерөнхийлөгч Х.Баттулга Турк Улсын Элчин сайдыг хүлээн авч уулзав

    2017-09-21

    Монгол Улсын Ерөнхийлөгч Х.Баттулга өнөөдөр Турк Улсаас Монгол Улсад суугаа Онц бөгөөд Бүрэн эрхт Элчин сайд Ахмет Язалыг хүлээн авч уулзав.

    Уулзалтын эхэнд Элчин сайд Ахмет Язал Турк Улсын Ерөнхийлөгч Режеп Тайип Эрдоганы Монгол Улсын Ерөнхийлөгчид ирүүлсэн мэндчилгээг уламжлаад хоёр талын харилцаа идэвхтэй өрнөж байгааг тэмдэглэв.

    Монгол Улсын Ерөнхийлөгч Х.Баттулга Турк Улсын Ерөнхийлөгчид хариу талархал илэрхийлээд “Турк Улс арьс шир боловсруулах үйлдвэрлэлийн их туршлагатай. Монгол бол ХАА-н орон. Далан сая толгой малтай” гээд хоёр талын хооронд арьс шир боловсруулах үйлдвэрийн чиглэлд хамтран ажиллах төсөл хэрэгжүүлэх санал дэвшүүлэх бодолтой байгаагаа илэрхийллээ.

    Дэлгэрэнгүй
  • Монгол Улсын Ерөнхийлөгчийн Тамгын газрын дарга З.Энхболд Авлигатай тэмцэх газрын дэргэдэх Олон нийтийн зөвлөлийн шинэчилсэн журмыг гардуулав

    2017-09-21

    Монгол Улсын Ерөнхийлөгчийн Тамгын газрын дарга З.Энхболд Авлигатай тэмцэх газрын дэргэдэх Олон нийтийн зөвлөлийн шинэчилсэн журмыг тус зөвлөлийн дарга Г.Баасан болон зөвлөлийн гишүүдэд өнөөдөр гардуулан өгөв.

    Энэ үеэр Монгол Улсын Ерөнхийлөгчийн Тамгын газрын дарга З.Энхболд хэлэхдээ “Монгол Улсын Ерөнхийлөгч Х.Баттулга 9 дүгээр сарын 20-нд буюу өчигдөр 30 дугаар зарлиг гаргаж Авлигатай тэмцэх газрын дэргэдэх Олон нийтийн зөвлөлийн ажиллах журмыг шинэчилж баталлаа.

    Хуучин журамтай харьцуулахад нэлээд өөрчлөлт орсон. Түүний хувийг Авлигатай тэмцэх газрын дэргэдэх Олон нийтийн зөвлөлийн дарга Г.Баасан, зөвлөлийн төлөөлөлд гардуулж байна. Журамд заасан зүйлүүдийг хэрэгжүүлэн ажиллаж, олон нийтийн зүгээс тавих хяналтыг үр дүнтэй тавина гэдэгт Монгол Улсын Ерөнхийлөгч итгэж байгаа” гэлээ. Энэ хяналт бол төрийн хяналт биш, иргэд, олон нийтийн хяналт байх ёстой гэдгийг Ерөнхийлөгчийн Тамгын газрын дарга З.Энхболд онцгойлон сануулж хэлсэн юм.

    Дэлгэрэнгүй
  • Монгол Улсын Ерөнхийлөгч Х.Баттулга цаг үеийн асуудлаар сэтгүүлчдийн асуултад хариуллаа

    2017-09-20

    Монгол Улсын Ерөнхийлөгч Х.Баттулга цаг үеийн зарим асуудлаар сэтгүүлчидтэй уулзаж, тэдний асуултад хариулсныг дэлгэрэнгүйгээр хүргэж байна.

    -НҮБ-ын Ерөнхий Ассамблейн 72 дугаар чуулганы үйл ажиллагаанд Монгол Улсын Ерөнхийлөгч оролцохгүй болсон талаар хэвлэл, мэдээллийн зарим хэрэгсэл, олон нийтийн сүлжээгээр мэдээлэл явж байна. Яагаад оролцохгүй болсон шалтгаанаа та тайлбарлана уу?

    -Дөнгөж сая энэ ширээн дээр бид Монгол Улсад 1976 оноос хойш ажиллаж байгаа НҮБ-ын Суурин төлөөлөгчийн газрын төлөөлөгчтэй уулзлаа. Уулзалтын явцад Монгол Улсын Ерөнхийлөгчийн институци, НҮБ хоёр шинэчилсэн арга барилаар ажиллая гэж санал нэгдлээ. Мөн ажилгүйдэл, ядуурал, байгаль орчны бохирдол буюу цөлжилт, хүүхдийн асуудал, агаарын бохирдол гэсэн таван том асуудлыг бид тойрч ярья. Арга барилаа өөрчилье гэж санал нэгдлээ.

    Саяхан бид Хүнсний аюулгүй байдлын асуудлаар Үндэсний чуулган хийсэн. Монгол Улс НҮБ-тай Ерөнхийлөгч, УИХ, Засгийн газрын түвшинд байнга хамтарч ажилладаг. НҮБ-ын Ерөнхий Ассамблейн чуулганд оролцоогүйгээр ач холбогдлоо багасгаж байгаа биш. НҮБ-ын Ерөнхий Ассамблейн тэгш тоотой чуулгануудад очих ёстой байх. НҮБ-ын Ерөнхий Ассамблейн энэ жилийн чуулган “Хүн төвтэй хөгжил” гэсэн ерөнхий сэдэвтэй. Сири, Хойд Солонгосын асуудлыг ярина. Тэр мэдээллүүдийг авч байгаа. Монгол Улсыг төлөөлж, Гадаад харилцааны сайдын үүрэг гүйцэтгэгч Ц.Мөнх-Оргил оролцож байгаа. ОХУ, Франц Герман зэрэг олон орон энэ чуулганд оролцоогүй юм билээ.

    Дэлгэрэнгүй
  • Монгол Улсын Ерөнхийлөгч Х.Баттулга НҮБ-ын Монгол дахь суурин төлөөлөгчийг хүлээн авч уулзав

    2017-09-20

    Монгол Улсын Ерөнхийлөгч Х.Баттулга НҮБ-ын Монгол дахь суурин төлөөлөгч Бэата Транкманныг өнөөдөр хүлээн авч уулзав. Уулзалтад НҮБ-ын Хүүхдийн сан, ХАС, Хөгжлийн хөтөлбөрийн төлөөлөл оролцов.

    Монгол Улсын Ерөнхийлөгч Х.Баттулга 1976 оноос хойш Монгол Улсад үйл ажиллагаа явуулж, хамтран ажиллаж байгаа НҮБ-ын суурин төлөөлөгчийн газрынханд талархал илэрхийлээд хамтын ажиллагаагаа илүү үр дүнтэй, бодитой болгохыг хүсч буйгаа илэрхийлэв. Нэн түрүүнд ажилгүйдэл, ядуурал, байгаль орчны асуудал, хүүхдийн асуудал, агаарын бохирдол гэсэн таван том асуудал дээр анхаарч, хамтран ажиллах талаар ярьж, НҮБ-ын Монгол дахь суурин төлөөлөгч Бэата Транкманн үүнтэй санал нэгтэй байгаагаа илэрхийллээ.

    Дэлгэрэнгүй
  • Монгол Улсын Ерөнхийлөгч Х.Баттулга: Бүх төрлийн спортоор үндэсний баатрууд төрүүлэх ёстой

    2017-09-20

    Монгол Улсын Ерөнхийлөгч Х.Баттулга өнөөдөр жудо, чөлөөт бөх, бокс, сагсан бөмбөг зэрэг төрлөөр амжилт гаргасан үндэсний шигшээ багийн дасгалжуулагч, багш нар, олимп, дэлхийн аваргын медальт тамирчдын төлөөллийг хүлээн авч уулзлаа.

    Монгол Улсын Ерөнхийлөгч Х.Баттулга “Үеийн үед спортын амжилт бол тухайн орны нүүр царай болдог. Төрийн далбаагаа мандуулж, төрийн дууллаа дэлхийд эгшиглүүлнэ гэдэг бол бахархал. Хүүхэд, залууст спорт үлгэр жишээ, цаг заваа зөв өнгөрүүлэх нээлттэй том сурталчилгаа учраас Монгол Улсын үе үеийн Ерөнхийлөгч нар спортыг өндөр хэмжээнд авч үзэж байсан” гээд цаашид болох тэмцээнүүд, 2020 оны олимпийн наадамд өндөр амжилт гаргахыг хүсэн ерөөв.

    Мөн нийтийн биеийн тамир, спортын топ төрлүүдийг хөгжүүлэхэд анхаарч, бүх төрлийн спортоор үндэсний баатрууд төрүүлэх ёстой гэлээ.

    Дэлгэрэнгүй