БАЯР НААДМЫН МЭНДЧИЛГЭЭ
Монголын ард түмэн, монгол оронд тухласан зочид гийчид та бүхэнд Тулгар төрийн 2226, Их Монгол Улсын 811, Үндэсний эрх чөлөөний хөдөлгөөний 106, Ардын хувьсгалын 96, Ардчилсан хувьсгалын 27 жилийн ой Үндэсний их баяр наадмын мэндийг дэвшүүлж, хотлоороо сайхан наадахыг ерөөж мэндчилье.
Монгол хүн бүрийн хоног тоолон хүлээдэг их баяр Үндэсний наадам бол морьтон ардын уламжлал, түүх, соёл, ёс заншлын цогц, Төрт ёсны өв билээ. Энэ их өв соёлыг тээгч, үргэлжлүүлэгч, дэлгэрүүлэгч нь болсон наадамчин олон, бөхчүүд, харваачид, уяачид та бүхэн минь сайхан наадаарай.
Эрэмгий бөхчүүд нь мэхтэй байг, эрдэнэт хүлгүүд нь хурдан байг, эрхий мэргэд нь цэцэн байг!
Монгол түмэн минь сэтгэл тэнүүн, цэнгэл баяр дүүрэн сайхан наадаарай !
Мөнх тэнгэр гүрэн Монголыг минь ивээг !
МОНГОЛ УЛСЫН ЕРӨНХИЙЛӨГЧ ХАЛТМААГИЙН БАТТУЛГА
2017 оны 7 дугаар сарын 10