Увс нуурын хотгорын шим мандлын нөөц газар, Хөвсгөл нуурын байгалийн цогцолборт газрыг ЮНЕСКО-гийн шим мандлын нөөц газраар батламжиллаа
Зүүн Азийн орнуудын шим мандлын нөөц газруудын сүлжээний ээлжит XVI хурал Кемпински зочид буудалд болж байна.
Хуралд сүлжээний гишүүн орнуудын төлөөлөгчид, сүлжээний Нарийн бичгийн дарга нарын газрын төлөөлөгчид, үндэсний болон орон нутгийн холбогдох эрх бүхий багууллагуудын 50 орчим төлөөлөгч оролцож байна.
Хурлаар өнгөрсөн хугацаанд хийсэн, цаашид хийх ажил, шим мандлын нөөц газруудад цар тахлын үзүүлсэн нөлөө, цар тахлын дараах нөхцөл байдал, үйл ажиллагаа, хадгалалт, хамгаалалтын талаар ярилцаж, туршлага солилцох юм.
ЮНЕСКО-гийн “Хүн ба шим мандал” хөтөлбөр нь байгаль орчинд үзүүлэх хүний хүчин зүйлийн олон талт нөлөөг судлах, байгалийн нөөц, баялгийг шинжлэх ухаан, судалгааны үндсэн дээр урт хугацаанд хадгалан хамгаалах зорилготой.
Хурлын үеэр Увс нуурын хотгорын хил дамнасан шим мандлын нөөц газар болон Хөвсгөл нуурын байгалийн цогцолборт газрыг ЮНЕСКО-гийн шим мандлын нөөц газруудаар бүртгэсэн батламжийг хүлээн авлаа.
Дэлхийн сүлжээнд бүртгүүлснээр хүрээлэн буй орчны тогтвортой байдлыг хангах, нутгийн иргэдийн амьдралыг дээшлүүлэхэд чиглэсэн хүчин чармайлтыг ЮНЕСКО дэмжин урамшуулах, шаардлагатай удирдамж чиглэлээр хангах, санхүүгийн нэмэлт эх үүсвэр хайхад дэмжлэг үзүүлэх юм.
Мөн бүс нутаг болон дэд бүс нутгийн сүлжээнд элсэн орж, сүлжээний зүгээс зохион байгуулж буй арга хэмжээ, хурал, сургалтад хамрагдах замаар бүс нутгийн болон олон улсын хамтын ажиллагаагаа идэвхжүүлэх, боловсон хүчний чадавх нэмэгдэх ач холбогдолтой юм.
Энэ удаагийн хурлыг Байгаль орчин, аялал жуулчлалын яам, ЮНЕСКО-ийн Монголын үндэсний комисс, “Хүн ба шим мандал” хөтөлбөрийн Монголын үндэсний хороо, ЮНЕСКО-ийн Бээжин дэх төлөөлөгчийн газар, Зүүн Азийн орнуудын шим мандлын нөөц газруудын сүлжээний Нарийн бичгийн дарга нарын газар, “Дэ нэйче консерванси” байгууллагын Монгол дахь төлөөлөгчийн газар болон бусад холбогдох байгууллагууд хамтран зохион байгуулж байна.
Зүүн Азийн орнуудын шим мандлын нөөц газруудын сүлжээний хурал хоёр жилд нэг удаа болдог бөгөөд 1997, 2003, 2007, 2013 онд Монгол Улсад зохион байгуулжээ.
Өнөөдрийн байдлаар Монгол Улс:
- 1990 онд Говийн их дархан цаазат газрыг;
- 1996 онд Богд Хан уулын дархан цаазат газрыг;
- 1997 онд Увс нуурын ай сав газрыг;
- 2002 онд Хустайн байгалийн цогцолборт газрыг;
- 2005 онд Дорнод Монголын дархан цаазат газрыг;
- 2007 онд Монгол Дагуурын дархан цаазат газрыг;
- 2020 онд Тосон-Хулстайн байгалийн нөөц газрыг;
- 2021 онд Увс нуурын хотгорыг хил дамнасан шим мандлын нөөц газрыг;
- 2022 онд Хөвсгөл нуурын байгалийн цогцолборт газрыг ЮНЕСКО-гийн Шим мандлын нөөц газруудын дэлхийн сүлжээнд бүртгүүлээд байна.