“Эрүүл монгол хүн” хөдөлгөөний хүрээнд НҮБ-ын Хүүхдийн сантай жишиг төсөл хэрэгжүүлнэ
Монгол Улсын Ерөнхийлөгчийн Эрүүл мэнд, спорт, нийгмийн бодлогын зөвлөх Т.Мөнхсайхан НҮБ-ын Хүүхдийн сангийн Монгол Улс дахь Суурин төлөөлөгч Др. Эваристе Коусси-Комланыг хүлээн авч уулзлаа.
Уулзалтаар Монгол Улсын Ерөнхийлөгчийн санаачлан хэрэгжүүлж буй “Эрүүл монгол хүн” үндэсний хөдөлгөөний хүрээнд насан туршийн эрүүл мэнд, ялангуяа эх, хүүхдийн эрүүл мэндийн талаар цогц үйл ажиллагаа бүхий жирэмсний бүлгийн хяналт, хүүхдийн эрүүл мэндийн хяналт, тандалтын тогтолцоо бий болгох жишиг төсөл хэрэгжүүлэх талаар санал солилцов.
НҮБ-ын Хүүхдийн сан “Эрүүл монгол хүн” үндэсний хөдөлгөөнийг анхнаас нь дэмжиж ирсэн бөгөөд 2024 онд тодорхой чиглэлээр хамтран ажиллана гэдгийг Суурин төлөөлөгч Др. Эваристе Коусси-Комла хэлэв.
