Малын гаралтай түүхий эдийн үнэ цэнийг нэмэгдүүлнэ
Монгол Улсын Ерөнхийлөгчийн санаачилсан, хөдөө аж ахуйн салбарт нэмүү өртөг шингэсэн бүтээгдэхүүний үйлдвэрлэлийг дэмжих, малын гаралтай түүхий эд, ноос, арьс шир, ноолуурын үнэ цэнийг нэмэгдүүлэх зорилготой “Цагаан алт” хөтөлбөрийн хүрээнд олон улсын түнш байгууллагуудтай хамтран ажиллана.
Ерөнхийлөгчийн Эдийн засгийн бодлогын зөвлөх Б.Даваадалай 2024 оны 10 дугаар сарын 08-ны өдөр Хөдөө аж ахуйн хөгжлийн олон улсын сангийн /IFAD/ Монгол Улсыг хариуцсан захирал Сакпохаусэт Мэнг тэргүүтэй төлөөлөгчдийг хүлээн авч уулзлаа.
Уулзалтаар малын эрүүл мэндийг сайжруулах, малын гаралтай түүхий эдийг боловсруулах, үнэ цэнийг өсгөх, уур амьсгалын өөрчлөлтийг даван туулах чиглэлээр санал солилцож, тодорхой ажлуудыг хамтран хэрэгжүүлэхээр тохиролцлоо.
“Цагаан алт” хөтөлбөрийг хэрэгжүүлснээр олон улсын стандартад нийцсэн өрсөлдөх чадвартай, гарал үүсэл, чанарын баталгаатай, нэмүү өртөг шингэсэн бүтээгдэхүүний үйлдвэрлэл, экспорт нэмэгдэж, малын гаралтай түүхий эдийн үнэ цэн өснө. Энэ хэрээр малчдын орлого, амьжиргаа сайжирч, хөдөө аж ахуй, хөнгөн үйлдвэрлэлийн салбар шинэ шатанд гарна.
Гурван жилийн хугацаанд хэрэгжүүлэх хөтөлбөрийн нийт төсөв 2.19 их наяд төгрөг бөгөөд үүнээс 682.4 тэрбум төгрөгийг улсын төсвөөс санхүүжүүлэхээр төлөвлөсөн. Арилжааны банкууд үйлдвэр, аж ахуйн нэгжүүдэд 1,51 их наяд төгрөгийн зээл олгох юм.
Мөн гадаадын зээл, тусламжийн хөрөнгөөр хэрэгжиж байгаа төсөл, хөтөлбөрүүдийг “Цагаан алт” хөтөлбөртэй уялдуулна.
