“Чингис хаан” тэргүүн зэргийн одонг олон улсад сурталчлан таниулах цахим хуудас нээлээ
Их эзэн Чингис хааны мэндэлсний 862 жилийн ой, “Монгол бахархлын өдөр”-ийг тохиолдуулан Монгол Улсын Ерөнхийлөгчийн Тамгын газрын санаачилгаар Их Монгол Улсыг үндэслэгч, Их эзэн Чингис хааны суу алдар, үйл хэрэг, төрт ёс, түүх, соёлын өв, үнэ цэнийг бататган бэхжүүлэх, “Чингис хаан” тэргүүн зэргийн одонг дэлхийн улс орнуудад сурталчлан таниулах зорилготой англи хэл дээрх https://chinggiskhaanaward.org сайтыг нээлээ.
Тус сайтад Мянганы суут хүмүүн Чингис хаан, Их Монгол Улс, монголчуудын дэлхий ертөнцөд тогтоосон “Pax Mongolica” буюу Монголын их амар амгалан, “Чингис хаан” тэргүүн зэргийн одон, 2005 оноос хойш одон хүртсэн эрхмүүд, байгууллагуудын намтар, бүтээлийн мэдээллийг багтаасан байна.
Тодруулбал:
- Их эзэн Чингис хааны хааны амьдрал, үйл хэрэг, түүний дэлхийд үзүүлсэн нөлөө, түүхэн ач холбогдлын талаарх мэдээлэл,
- Pax Mongolica – Монголын эзэнт гүрний үед бий болсон энх тайвны бодлого, олон улс дамнасан худалдаа арилжаа, соёлын солилцооны үүрэг, түүхэнд ямар нөлөө үзүүлсэн талаарх танилцуулга,
- “Чингис хаан” тэргүүн зэргийн одонгийн үүсэл, зорилго зэргийн талаарх танилцуулга,
- Одонд дэвшүүлэх шалгуур болон сонгон шалгаруулалтын тухай мэдээлэл,
- 2005 оноос хойш одон хүртэгсдийн талаарх дэлгэрэнгүй мэдээлэл, амжилт, бүтээл,
- Одон гардуулах ёслол, шагнал хүртсэн эрхмүүдийн түүхэн агшнуудыг харуулсан фото болон видео цомог гэсэн үндсэн зургаан цэсээс бүрджээ.
Сайтад мөн Их эзэн Чингис хаан улс орнуудад худалдаа арилжаа, гар урлал, соёл, шинжлэх ухаан зэрэг олон салбарт шинэчлэл хийн, өргөн уудам нутгийг өртөөгөөр холбож, өнөөгийн харилцаа холбооны сүлжээг бий болгосон, байгаль дэлхийгээ хэрхэн хайрлан хамгаалж, зохицон амьдарч байсан зэрэг агуулгыг багтаасан байна.