Монгол Улсын Ерөнхийлөгч Х.Баттулга “Дэлхийн цагаан таягтны өдөр”-т зориулан өнөөдөр илгээлт явуулав. Уг илгээлтэд:
“Эрхэм хүндэт зочид, ноёд хатагтай нар аа,
“Дэлхийн цагаан таягтны өдөр” буюу хараагүйчүүдийн эрхийг хамгаалах өдрийг тохиолдуулан, Та бүхэнд мэндчилгээ дэвшүүлж байгааг минь хүлээн авна уу.
Дэлхий нийтээр 1979 оноос эхлэн тэмдэглэж эхэлсэн энэ өдөр хараагүй иргэд өөрсдийн эрхийг хамгаалах, үзэл бодол, дуу хоолойгоо төр засаг, олон нийтэд хүргэх, тулгамдаж байгаа асуудлуудаа хэлэлцэж, шийдвэрлэх арга замуудыг хайсаар ирсэн билээ.
Манай улсын хувьд нийт 11000 орчим харааны бэрхшээлтэй иргэн байна. Хөгжлийн бэрхшээлтэй иргэдийн ажиллаж амьдрах, сурч боловсрох, тэднийг нийгмийн харилцаанд бусдын адил тэгш оролцуулах боломж нөхцөлөөр хангахад Монголын төр засгийн зүгээс анхааран, өөрсдийн боломжийн хэмжээнд ажиллаж байгааг дурдахын сацуу цаашид хууль тогтоомжийг боловсронгуй болгох, төр, засгийн үйлчилгээ, халамж анхаарлыг олон улсын жишигт хүргэхийн төлөө хичээнгүйлэн ажиллах шаардлагатайг тэмдэглэе.
Хөгжлийн бэрхшээлтэй иргэдэд тулгамдаж буй асуудлуудыг шийдвэрлэхийн төлөө зөвхөн төрийн зүгээс бус, нийт иргэд, аж ахуйн нэгж, байгууллага, хувь хүн бүр хамтран ажиллаж, оюун сэтгэлгээ, зүрх сэтгэлдээ тэднийг хайрлах орон зайг бий болгож, чин сэтгэлээсээ хандсанаар аливаа асуудлыг цогцоор нь хялбар, шуурхай шийдвэрлэх бололцоотой юм. Иймээс бүх хүмүүсийг цагаан таягтнууд болон нийт хөгжлийн бэрхшээлтэй иргэдийнхээ төлөө анхаарал тавин, хамтран ажиллахыг хүн бүрт уриалж байна.
Цагаан таяг хэрэглэж байгаа хүнийг хүсэл зорилгоо илэрхийлэхийн төлөө, мөн чөлөөтэй байхыг эрмэлзэж байгаагийн илрэл хэмээн боддог. Та бүхэнд нийгмийн хамгаалал, хөдөлмөр эрхлэлт, дэд бүтэц, нийгэмд тэгш оролцох оролцоо гээд тулгамдаж буй олон асуудлыг ойлгож буйн хувьд уг асуудлуудыг даруй шийдвэрлэх ёстой хэмээн миний бие Монгол Улсын Ерөнхийлөгчийн хувиар үзэж байна. Үүний тулд улс орныхоо хөгжил дэвшил, сайхан ирээдүй, сайн цагийг бүтээхийн төлөө хичээн зүтгэх болно.
Та бүхний амьдрал гэрэл гэгээтэй, үйлс бүтэмжтэй байхыг хүсэн ерөөе. Сайн үйлс бүхэн ашид дэлгэрэх болтугай” гэжээ.