Монгол Улсын Ерөнхийлөгч Х.Баттулга Хүний нөөцийн ажилтны зөвлөгөөнд оролцогчдод өнөөдөр илгээлт явууллаа.
Монгол Улсын Ерөнхийлөгчийн илгээлтэд :
”Эрхэм зочид төлөөлөгчид өө,
Хүндэт хатагтай ноёд оо,
“Үндэсний баялаг – хүний нөөц” уриатайгаар зохион байгуулагдаж байгаа Хүний нөөцийн ажилтны зөвлөгөөний оролцогч Та бүхэнд 10 дугаар сарын 15-нд болох Монголын Хүний нөөцийн ажилтны өдрийн баярын мэндийг дэвшүүлье.
Аливаа улс орны хөгжлийг хөдөлмөр бүтээж байдаг бол хөдөлмөрийн үр шимийг хүний нөөцийн чадамжаар хэмжиж болно. Иймд хүний нөөцийн удирдлага нь хөдөлмөр эрхлэлт, хөдөлмөрийн бүтээмж, харилцаа; мэдлэг боловсрол, ур чадвар бүхий ажилтнуудыг бэлтгэх, зохион байгуулахад гол үүргийг гүйцэтгэдэг.
Тус зөвлөгөөний зорилго нь монгол хүний үнэлэмж хэмээх маш чухал нэгэн ойлголтыг хөндөж байгаад туйлын баяртай байна. Монгол хүний үнэ цэнээр Монгол Улсын нэр хүндийг, Монгол Улсын нэрээр монгол хүний үнэлэмжийг тодорхойлно. Зөвлөгөөн нь монгол хүний үнэ цэнийг Монгол Улсын хэмжээнд төдийгүй дэлхийн түвшинд нэмэгдүүлэхийг зорилгоо болгосон байгаа нь улс эх орныхоо нэр хүнд, хөгжлийг дэлхийн түвшинд хүргэх боловсон хүчинг бэлтгэх, хөгжүүлэхэд оршиж байна гэж харж байна. Монгол хүн, Монголын боловсон хүчинг хөгжүүлж, үнэлэмжийг дэлхийн хэмжээнд хүргэх хүний нөөцийн бодлого манай улсад ус агаар мэт хэрэгтэй байна.
Хүн бүр ажиллах хүчин болж, улс орныхоо хөгжилд гар бие, сэтгэл зүтгэлээ өргөдгийн учир хүний нөөцийн асуудал бол улс төр, эдийн засаг, соёл, боловсрол, шинжлэх ухаан, нийгэм, хүмүүнлэг гээд бүхий л салбарын асуудал мөн. Тиймээс эдийн засгийн хүндрэл бэрхшээлийг даван туулахад ч хүний нөөцийн зөв бодлого стратеги нь үр өгөөжтэй арга юм.
Ажилгүй иргэдийн тоо их байгаа боловч ажил олгогчдын хэрэгцээ шаардлагад нийцсэн мэргэжлийн боловсон хүчин цөөн байгаад зөвлөгөөнд оролцогчид дүгнэлт хийж, мэргэжлийн ур чадвар бүхий боловсон хүчинг бэлтгэх, сайжруулах асуудлыг шийдвэрлэх арга замыг Та бүхэн тодорхойлох учиртай.
Одоо ашиглаж буй арга барилаа сайжруулахаас гадна гадаадын шилдэг туршлагыг авч нутагшуулах шаардлагатай. Цаашид хүний нөөцийн салбарын эрх зүйн орчин, төрийн бодлогыг боловсронгуй болгох, ажлын байрны удирдлагыг хангах, ажил олгогч болон ажиллах хүчний уялдаа холбооны тогтолцоог төлөвшүүлэх, зэрэг асуудалд анхаарлаа хандуулах нь хүний нөөцийн удирдлага, бүтээмжийн менежментийн өмнө тавигдаж буй чухал зорилт гэж үзэж байна.
Чухамхүү эдгээр асуудалд Хүний нөөцийн ажилтны зөвлөгөөн зохих хариу олж чадна гэж найдаж байна.
Зөвлөгөөний үйл ажиллагаанд амжилт хүсье” гэсэн байна.