Монгол Улсын Ерөнхийлөгч Стратегийн ач холбогдол бүхий ордуудыг ашигладаг, ихээхэн хэмжээний гадаад валютын орлоготой үндэсний болон гадаадын хөрөнгө оруулалттай томоохон компаниудын мөнгөн гүйлгээ, төлбөр тооцоог Монгол Улсын банк, санхүүгийн байгууллагаар дамжуулан гүйцэтгэдэг эрх зүйн орчинг бүрдүүлэх зорилгоор энэхүү хуулийн төслийг санаачилж байна.
Монгол Улсын Их Хурлын 2016 оны 71 дүгээр тогтоолоор баталсан “Эдийн засгийг сэргээх хөтөлбөр”-ийн зорилт, арга хэмжээний 1.3-т “гадаад валютын орох урсгалыг нэмэгдүүлэх”, 2017 оны 42 дугаар тогтоолоор баталсан “Монгол Улсын эдийн засаг, нийгмийг 2018 онд хөгжүүлэх үндсэн чиглэл”-д валют болон мөнгөний захын дэд бүтцийг боловсронгуй болгох зорилт, арга хэмжээг хэрэгжүүлэхээр тус тус заасан.
Монгол Улсын төлбөрийн тэнцлийн тоон үзүүлэлтээс харахад стратегийн ач холбогдол бүхий ордуудыг ашигладаг, ихээхэн хэмжээний гадаад валютын орлоготой үндэсний болон гадаадын хөрөнгө оруулалттай томоохон компаниуд нь гадаад валютын улсын нөөцийн хэмжээ, төлбөрийн тэнцэл, валютын захад нөлөөлөхүйц мөнгөн урсгал, гүйлгээтэй байгаа тул гадаад валютын нөөц болон валютын урсгалыг нэмэгдүүлэх хүрээнд Засгийн газар, Монголбанкнаас эдгээр хуулийн этгээдтэй хамтран ажиллах эрх зүйн орчинг бүрдүүлэх шаардлагатай байгаа юм.
Одоо хүчин төгөлдөр мөрдөж буй Валютын зохицуулалтын тухай, Төв банк (Монголбанк)-ны тухай хуульд зааснаар Монголбанк валютын гүйлгээг зохицуулах, улсын гадаад валютын нөөцийг эзэмшин, удирдах үйл ажиллагаа явуулж байгаа боловч гадаад валютын их хэмжээний орлого бүхий хуулийн этгээдтэй валют худалдан авахаас бусад хэлцэл хийх эрхгүй байгаа нь хуулийн төсөл боловсруулах үндэслэл болсон юм.
Та энэхүү хуулийн төсөл болон хуулийн төслийн үзэл баримтлал, танилцуулга, судалгаа, материалтай сайтар танилцаж өөрийн санал, зөвлөмжийг tusul@president.mn хаягаар ирүүлнэ үү.