Монгол Улсын тав дахь Ерөнхийлөгч Х.Баттулгаас зургаа дахь Ерөнхийлөгч У.Хүрэлсүхэд үлдээсэн захиас
Монгол Улсын Ерөнхийлөгчийн хувьд миний бие эв нэгдлийг эрхэмлэж, үндэсний эрх ашгаа дээдлэх, эрх чөлөө шударга ёсыг сахин хамгаалах, эдийн засгаа сэргээж, аж үйлдвэрийг хөгжүүлэх, экологийн тэнцвэрийг хангаж, газар нутгаа хамгаалах, экспортын шинэ эринийг эхлүүлж, эрх тэгш гадаад харилцааг эрхэмлэх эрхэм зорилтоо хэрэгжүүлэхийн төлөө хоёргүй сэтгэлээр хүчин зүтгэж ирлээ. Өнгөрсөн хугацаанд миний санаачлан хийж хэрэгжүүлсэн ажил, бий болгосон боломж, эхлүүлсэн ажлыг үргэлжлүүлэн тээж, Төрийн тэргүүний хувьд дараах тодорхой асуудалд онцгой анхаарч ажиллахыг төрт ёсны залгамж чанарыг дээдлэн ДААЛГАВАР болгон захиж байна.
- Коронавирусийн цар тахлын улмаас үүссэн нөхцөл байдалд Монгол төрийн тэргүүний байр сууринаас дүгнэлт хийж, монгол хүний хөгжлийн үндсэн хүчин зүйл болсон боловсролын хоцрогдлыг арилгаж, коронавирусийн өмнөх үеийн хүүхдийн боловсролын чанарын түвшинд богино хугацаанд хүргэх зорилтот хөтөлбөр гаргаж хэрэгжүүлэх, түүнчлэн коронавирусийн мутацид орсон хувилбар болох “дельта” вирусээс үүдэн Монгол Улсад цар тахлын хоёр дахь давалгаа эхлэх эрсдэлээс урьдчилан сэргийлэх цогц арга хэмжээг яаралтай авч хэрэгжүүлэх;
- Оюутолгой төслийг хэрэгжүүлэх явцад Монгол Улсын Ерөнхий сайд асан Сү.Батболд нарын төрийн өндөр албан тушаалтнууд авлига албан тушаалын хэрэгт холбогдсон нь Монголын болон олон улсын хуулийн байгууллагаар тогтоогдсоныг үндэслэн уг гэрээг Монголын ард түмний эрх ашигт нийцүүлэн сайжруулах арга хэмжээ авах;
- 2009 оны Монгол Улс, БНХАУ-ын хооронд байгуулсан (Своп) хэлцлийн 15 тэрбум юань, 2018-2021 онд хууль хяналтын байгууллага (АТГ, Прокурор)-ын оффшор бүсэд илрүүлсэн 4 орчим их наяд төгрөгийг Монгол банканд татан төвлөрүүлж, экспортод чиглэсэн үйлдвэрлэл (Дарханы арьс ширний цогцолбор гм)-ийг дэмжих, нам бус, олон нийтийн оролцоонд тулгуурласан судалгаагаар тогтоогдсон дампуурсан болон, үйл ажиллагаа нь саарсан аж ахуйн нэгжүүдийг сэргээх зорилгоор урт хугацааны нэн хөнгөлөлттэй санхүүжилтээр дэмжих, аж ахуйн нэгжээс төлсөн ажиллагсдын нийгмийн даатгалын шимтгэлийг буцаан олгох, төлж чадаагүй өрийг чөлөөлөх;
- Төрийн мэдлийн “Овоот хяр”-ын ордын 100 хүртэлх тонн алтыг олборлож, боловсруулах үйлдвэр байгуулж, бий болгосон валютын нөөцөөр хүнд аж үйлдвэрийн (Зэс-алтны, ган-төмөрлөгийн, кокс-химийн) салбарыг санхүүжүүлэх;
- Монгол инженерүүдийн оюун ухаан, монгол залуучуудын хүч хөдөлмөрөөр бүтээсэн 800 гаруй км төмөр замын их бүтээн байгуулалтын ажлыг үргэлжлүүлж, 2010 оны 6 дугаар сарын 24-ний өдөр Монгол Улсын Их Хурлаас баталсан 6,000 км хүртэлх төмөр замыг барьж байгуулах;
- Эрдэс баялгийн онцгой сав нутаг – говийн бүсийн цөлжилтийг зогсооход уул уурхайн салбарын хөрөнгө оруулалтыг татан оруулж, усжуулах, шинэ хот байгуулах ажлыг хэрэгжүүлэх.
МОНГОЛ УЛСЫН ТАВ ДАХЬ ЕРӨНХИЙЛӨГЧ ХАЛТМААГИЙН БАТТУЛГА