ᠮᠣᠩᠭ᠋᠋ᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠬ ∙ ᠪᠠᠲᠤᠲᠤᠯᠭᠠ ᠥᠨᠥᠳᠥᠷ ᠲᠤᠯᠭᠤᠷ ᠲᠥᠷᠦ ᠢᠢᠨ 2227᠂ ᠶᠡᠬᠡ ᠮᠣᠩᠭ᠋᠋ᠣᠯ ᠤᠯᠤᠰ ᠤᠨ 812᠂ ᠦᠨᠳᠦᠰᠦᠨ ᠦ ᠡᠷᠬᠡ ᠴᠢᠯᠦᠭᠡᠨ ᠦ ᠬᠤᠪᠢᠰᠬᠠᠯ ᠤᠨ 107 ᠂ ᠠᠷᠠᠳ ᠤᠨ ᠬᠤᠪᠢᠰᠬᠠᠯ ᠤᠨ 97 ᠵᠢᠯ ᠦᠨ ᠣᠢ᠂ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯ ᠤᠨ 29 ᠵᠢᠯ ᠦᠨ ᠣᠢ᠂ ᠦᠨᠳᠦᠰᠦᠨ ᠦ ᠶᠡᠬᠡ ᠪᠠᠶᠠᠷ ᠨᠠᠭᠠᠳᠤᠮ ᠢ ᠨᠡᠭᠡᠭᠡᠵᠦ ᠦᠭᠡ ᠬᠡᠯᠡᠯᠡ᠃
ᠮᠣᠩᠭ᠋᠋ᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠬ ∙ ᠪᠠᠲᠤᠲᠤᠯᠭᠠ ᠦᠨᠳᠦᠰᠦᠨ ᠦ ᠶᠡᠬᠡ ᠪᠠᠶᠠᠷ ᠨᠠᠭᠠᠳᠤᠮ ᠢ ᠨᠡᠭᠡᠭᠡᠵᠦ᠄
《ᠨᠠᠭᠠᠳᠤᠮᠴᠢᠨ ᠣᠯᠠᠨ ᠮᠣᠩᠭ᠋᠋ᠣᠯᠴᠤᠳ ᠠ᠋᠂
ᠮᠠᠨ ᠤ ᠤᠯᠤᠰ ᠲᠤ ᠮᠣᠷᠢᠯᠠᠨ ᠢᠷᠡᠭᠰᠡᠨ ᠭᠠᠳᠠᠭᠠᠳᠤ ᠢᠢᠨ ᠵᠢᠭᠤᠯᠴᠢᠳ᠂ ᠠᠨᠳᠠ ᠨᠥᠬᠥᠳ ᠡ
ᠮᠣᠩᠭ᠋᠋ᠣᠯ ᠤᠨ ᠲᠥᠷᠥᠳᠦ ᠶᠣᠰᠣᠨ ᠤ ᠶᠡᠬᠡ ᠴᠡᠩᠭᠡᠯ – ᠮᠣᠩᠭ᠋ᠤᠯ ᠨᠠᠭᠠᠳᠤᠮ ᠳᠤ ᠲᠠᠪᠠᠲᠠᠢ ᠮᠣᠷᠢᠯᠠᠨᠠ ᠤᠤ᠃
ᠪᠢᠳᠡᠨ ᠦ ᠡᠪᠦᠭᠡ ᠳᠡᠭᠡᠳᠦᠰ ᠨᠡᠩ ᠡᠷᠲᠡᠨ ᠡᠴᠡ ᠮᠣᠷᠢᠳ ᠤᠨ ᠢᠶᠠᠨ ᠬᠤᠷᠳᠤ ᠢᠢ᠂ ᠪᠡᠶᠡ ᠢᠢᠨ ᠢᠶᠡᠨ ᠬᠦᠴᠦ ᠢᠢ᠂ ᠬᠠᠷᠠᠭᠠᠨ ᠤ ᠪᠠᠨ ᠬᠤᠷᠴᠠ ᠢᠢ ᠰᠣᠷᠢᠵᠤ᠂ ᠢᠳᠡ ᠬᠠᠪᠤ ᠪᠠᠨ ᠭᠠᠢᠢᠬᠠᠭᠤᠯᠤᠨ ᠨᠠᠭᠠᠳᠳᠠᠭ ᠪᠠᠢᠢᠭᠰᠠᠨ ᠨᠢ ᠠᠭᠤᠯᠭᠠ ᠪᠠᠨ ᠬᠠᠳᠠᠭᠠᠯᠠᠵᠤ᠂ ᠬᠡᠯᠪᠡᠷᠢ ᠪᠡᠨ ᠴᠠᠭ ᠤᠨ ᠠᠶᠠᠰ ᠲᠤ ᠲᠣᠬᠢᠷᠠᠭᠤᠯᠤᠨ ᠬᠥᠭ᠍ᠵᠢᠭᠦᠯᠵᠦ ᠢᠷᠡᠭᠰᠡᠨ ᠤᠯᠠᠮᠵᠢᠯᠠᠯ ᠥᠨᠥᠳᠥᠷ ᠢ ᠬᠦᠷᠲᠡᠯᠡ ᠬᠠᠳᠠᠭᠠᠯᠠᠵᠤ ᠶᠠᠪᠤᠭᠠ ᠢᠢᠨ ᠲᠣᠳᠣ ᠢᠯᠡᠷᠡᠯ ᠨᠢ ᠮᠣᠩᠭ᠋ᠤᠯ ᠨᠠᠭᠠᠳᠤᠮ ᠶᠤᠮ᠃ ᠲᠡᠦᠬᠡ ᠰᠥᠬᠦᠪᠡᠯ ᠪᠥᠬᠡ ᠪᠠᠷᠢᠯᠳᠤᠵᠤ᠂ ᠦᠵᠡᠭᠴᠢᠳ ᠲᠣᠭᠣᠷᠢᠨ ᠪᠠᠶᠠᠰᠴᠤ ᠪᠤᠢ ᠢᠢ ᠳᠦᠷᠰᠦᠯᠡᠭᠰᠡᠨ ᠬᠠᠳᠠᠨ ᠤ ᠵᠢᠷᠤᠭ ᠮᠣᠩᠭ᠋᠋ᠣᠯ ᠤᠨ ᠮᠠᠨᠢ ᠭᠠᠵᠠᠷ ᠨᠤᠲᠤᠭ ᠠᠴᠠ ᠣᠯᠳᠠᠭᠰᠠᠨ ᠨᠢ 9 ᠮᠢᠩᠭ᠋ᠠ ᠭᠠᠷᠤᠢ ᠵᠢᠯ ᠦᠨ ᠡᠮᠦᠨᠡᠬᠢ ᠰᠢᠨᠡ ᠴᠢᠯᠠᠭᠤᠨ ᠵᠡᠪᠰᠡᠭ ᠦᠨ ᠦᠶᠡ ᠳᠥ ᠬᠠᠮᠢᠶᠠᠷᠤᠯ ᠲᠠᠢ ᠪᠠᠢᠢᠳᠠᠭ ᠶᠤᠮ ᠪᠠᠢᠢᠨᠠ᠃ ᠡᠨᠡ ᠪᠣᠯ ᠨᠠᠭᠠᠳᠤᠮ ᠯᠠᠪᠲᠠᠢ 9 ᠮᠢᠩᠭ᠋ᠠ ᠭᠠᠷᠤᠢ ᠵᠢᠯ ᠦᠨ ᠲᠡᠦᠬᠡᠨ ᠤᠯᠠᠮᠵᠢᠯᠠᠯ ᠲᠠᠢ ᠪᠣᠯᠬᠤ ᠢᠢ ᠬᠠᠷᠠᠭᠤᠯᠤᠭᠰᠠᠨ ᠲᠣᠳᠣ ᠪᠠᠷᠢᠮᠲᠠ ᠶᠤᠮ᠃
ᠳᠡᠯᠡᠬᠡᠢ ᠢᠢᠨ ᠣᠯᠠᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠬᠤᠷᠠᠨ ᠴᠤᠭᠯᠠᠵᠤ᠂ ᠴᠡᠩᠭᠡᠨ ᠪᠠᠶᠠᠰᠬᠤ ᠳᠤ ᠪᠠᠨ ᠬᠤᠷᠳᠤ᠂ ᠬᠦᠴᠦ᠂ ᠠᠪᠬᠠᠯᠵᠢ ᠰᠠᠮᠪᠠᠭᠠ ᠪᠠᠨ ᠰᠣᠷᠢᠬᠤ ᠡᠷᠡᠮᠡᠯᠵᠡᠯ ᠲᠡᠢ ᠪᠠᠢᠢᠳᠠᠭ ᠠᠴᠠ ᠰᠫᠣᠷᠲ ᠤᠨ ᠴᠡᠩᠭᠡᠭᠡᠨ ᠨᠠᠭᠠᠳᠤᠮ ᠤᠳ ᠡᠭᠦᠰᠴᠦ᠂ ᠤᠯᠠᠮᠵᠢᠯᠠᠯ ᠪᠣᠯᠤᠭᠰᠠᠨ ᠭᠡᠵᠦ ᠦᠵᠡᠳᠡᠭ᠃ ᠮᠣᠩᠭ᠋ᠤᠯ ᠨᠠᠭᠠᠳᠤᠮ ᠪᠣᠯ ᠨᠡᠭᠦᠳᠡᠯᠴᠢᠨ ᠠᠷᠠᠳ ᠲᠦᠮᠡᠨ ᠨᠦᠭᠦᠳ ᠦᠨ ᠬᠤᠪᠢ ᠳᠤ ᠡᠷᠲᠡᠨ ᠦ ᠭᠷᠧᠺ ᠦᠨ ᠣᠯᠢᠮᠫ ᠤᠨ ᠨᠠᠭᠠᠳᠤᠮ ᠠᠴᠠ ᠳᠤᠲᠠᠬᠤ ᠪᠠᠷ ᠦᠭᠡᠢ ᠠᠴᠢ ᠬᠣᠯᠪᠣᠭᠳᠠᠯ᠂ ᠨᠡᠷᠡ ᠬᠦᠨᠳᠦᠲᠡᠢ ᠶᠡᠬᠡ ᠴᠡᠩᠭᠡᠯ ᠨᠠᠭᠠᠳᠤᠮ ᠪᠠᠢᠢᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃
ᠮᠣᠩᠭ᠋᠋ᠣᠯᠴᠤᠳ ᠨᠠᠭᠠᠳᠤᠮ ᠤᠨ ᠦᠶᠡ ᠪᠡᠷ ᠰᠥᠷᠭᠡᠯᠳᠦᠭᠡᠨ᠂ ᠵᠥᠷᠢᠴᠡᠯ ᠲᠡᠮᠡᠴᠡᠯ ᠢᠶᠡᠨ ᠵᠣᠭᠰᠣᠭᠠᠵᠤ᠂ ᠡᠪ ᠡᠶᠡ ᠢᠢ ᠡᠷᠬᠢᠮᠯᠡᠨ ᠡᠯᠳᠡᠪ ᠤᠯᠤᠰ ᠲᠦᠷᠵᠢᠯᠲᠠ᠂ ᠲᠠᠯᠠᠴᠠᠯ ᠠᠴᠠ ᠠᠩᠭᠢᠳᠠ ᠨᠠᠭᠠᠳᠬᠤ ᠢᠢ ᠡᠷᠬᠢᠮᠯᠡᠵᠦ᠂ ᠮᠥᠷᠳᠡᠵᠦ ᠢᠷᠡᠭᠰᠡᠨ᠃ ᠨᠠᠭᠠᠳᠤᠮ ᠪᠣᠯ ᠪᠦᠬᠦ ᠠᠷᠠᠳ ᠲᠦᠮᠡᠨ ᠦ ᠡᠪ ᠨᠢᠭᠡᠳᠦᠯ᠂ ᠣᠢᠢᠯᠠᠭᠠᠯᠴᠠᠯ ᠤᠨ ᠪᠠᠶᠠᠷ᠂ ᠡᠨᠡ ᠪᠣᠯ ᠰᠫᠣᠷᠲ ᠤᠨ ᠶᠡᠬᠡ ᠴᠡᠩᠭᠡᠭᠦᠨ ᠶᠤᠮ᠃ ᠦᠶᠡ ᠢᠢᠨ ᠦᠶᠡ ᠳᠥ ᠡᠢᠢᠮᠦ ᠯᠠ ᠪᠠᠢᠢᠭᠰᠠᠨ᠃ ᠥᠨᠥ ᠴᠠᠭ ᠲᠤ ᠴᠤ ᠡᠪᠦᠭᠡᠳ ᠡᠴᠡ ᠥᠪᠯᠡᠭᠰᠡᠨ ᠤᠯᠠᠮᠵᠢᠯᠠᠯ ᠢᠶᠠᠨ ᠳᠠᠭᠠᠨ ᠰᠠᠢᠢᠬᠠᠨ ᠨᠠᠭᠠᠳᠴᠤ ᠪᠠᠢᠢᠨᠠ᠃
ᠦᠨᠳᠦᠰᠦᠲᠡᠨ ᠦ ᠣᠷᠣᠰᠢᠨ ᠲᠣᠭᠲᠠᠨᠢᠯ ᠤᠨ ᠦᠨᠳᠦᠰᠦ ᠢᠢᠨ ᠦᠨᠳᠦᠰᠦ ᠨᠢ ᠥᠪ ᠰᠤᠶᠤᠯ᠂ ᠲᠡᠦᠬᠡ ᠤᠯᠠᠮᠵᠢᠯᠠᠯ ᠪᠥᠭᠡᠳ ᠲᠡᠭᠦᠨ ᠢ ᠠᠮᠢᠳᠤᠷᠠᠭᠤᠯᠤᠭᠴᠢ᠂ ᠦᠶᠡ ᠡᠴᠡ ᠦᠶᠡ ᠳᠥ ᠳᠠᠮᠵᠢᠭᠤᠯᠤᠨ ᠲᠡᠭᠡᠭᠡᠭ᠍ᠴᠢᠳ ᠨᠢ ᠠᠷᠠᠳ ᠲᠦᠮᠡᠨ ᠪᠠᠢᠢᠳᠠᠭ᠃ ᠮᠣᠩᠭ᠋᠋ᠣᠯ ᠨᠠᠭᠠᠳᠤᠮ ᠠᠮᠢᠳᠤ᠂ ᠰᠣᠨᠢᠷᠬᠠᠯᠲᠠᠢ᠂ ᠬᠣᠣᠰ ᠦᠭᠡᠢ ᠪᠠᠢᠢᠭᠠ ᠢᠢᠨ ᠤᠭ ᠰᠢᠯᠲᠠᠭᠠᠨ ᠢ ᠮᠡᠷᠭᠡᠨ ᠠᠷᠠᠳ ᠤᠨ ᠮᠢᠨᠢ ᠰᠡᠳᠬᠢᠯ ᠳᠥ ᠪᠤᠢ ᠭᠡᠵᠦ ᠰᠠᠨᠠᠳᠠᠭ᠃ ᠨᠠᠭᠠᠳᠤᠮᠴᠢᠨ ᠣᠯᠠᠨ ᠲᠠ ᠪᠦᠬᠦᠨ ᠮᠣᠩᠭ᠋᠋ᠣᠯ ᠰᠤᠶᠤᠯ ᠢᠶᠠᠨ ᠬᠠᠳᠠᠭᠠᠯᠠᠵᠤ᠂ ᠥᠪᠯᠡᠭᠦᠯᠵᠦ᠂ ᠪᠠᠬᠠᠷᠬᠠᠵᠤ᠂ ᠪᠢᠰᠢᠷᠡᠵᠦ ᠢᠷᠡᠭᠰᠡᠨ ᠦ ᠭᠠᠪᠢᠶᠠ ᠪᠠᠷ ᠮᠣᠩᠭ᠋ᠤᠯ ᠨᠠᠭᠠᠳᠤᠮ ᠥᠨᠥᠳᠥᠷ ᠣᠯᠠᠨ ᠠᠷᠠᠳ ᠢᠶᠠᠨ ᠪᠠᠶᠠᠰᠬᠠᠨ᠂ ᠭᠠᠳᠠᠨᠠ ᠢᠢᠨ ᠵᠢᠭᠤᠯᠴᠢᠳ ᠢ ᠲᠠᠲᠠᠭᠰᠠᠭᠠᠷ ᠪᠠᠢᠢᠭᠠ ᠭᠡᠳᠡᠭ ᠲᠥ ᠪᠢ ᠢᠲᠡᠭᠡᠳᠡᠭ᠃ ᠨᠠᠭᠠᠳᠤᠮᠴᠢᠨ ᠣᠯᠠᠨ ᠳᠤ ᠪᠠᠨ᠂ ᠥᠪ ᠰᠤᠶᠤᠯ ᠢᠶᠠᠨ ᠣᠯᠠᠨ ᠮᠢᠩᠭ᠋ᠠᠨ ᠵᠢᠯ ᠠᠪᠴᠤ ᠶᠠᠪᠤᠭᠠ ᠠᠷᠠᠳ ᠲᠦᠮᠡᠨ ᠳᠥ ᠪᠡᠨ ᠪᠠᠶᠠᠷᠯᠠᠯᠠ᠃
ᠮᠣᠩᠭ᠋ᠤᠯ ᠨᠠᠭᠠᠳᠤᠮ ᠪᠣᠯ ᠰᠫᠣᠷᠲ ᠤᠨ ᠤᠷᠤᠯᠳᠤᠭᠠᠨ ᠲᠡᠮᠡᠴᠡᠭᠡᠨ ᠡᠴᠡ ᠭᠠᠳᠠᠨᠠ ᠪᠢᠳᠡᠨ ᠦ ᠥᠪ ᠤᠯᠠᠮᠵᠢᠯᠠᠯ᠂ ᠦᠨᠳᠦᠰᠦᠨ ᠦ ᠰᠤᠶᠤᠯ ᠤᠷᠠᠯᠢᠭ ᠢ ᠪᠠᠬᠠᠳᠤᠨ ᠬᠠᠷᠠᠬᠤ ᠥᠷᠭᠡᠨ ᠪᠣᠯᠤᠮᠵᠢ ᠢᠢ ᠣᠯᠭᠤᠳᠠᠭ ᠴᠡᠩᠭᠡᠭᠦᠨ ᠪᠢᠯᠡ᠃ ᠮᠣᠩᠭ᠋᠋ᠣᠯ ᠤᠨ ᠳᠠᠭᠤ ᠭᠡᠪᠡᠯ ᠮᠣᠲ᠋ᠣᠷ ᠤᠨ ᠳᠠᠭᠤ ᠪᠢᠰᠢ ᠮᠣᠷᠢᠲᠠᠨ ᠠᠷᠠᠳ ᠤᠨ ᠭᠠᠢᠢᠬᠠᠮᠠ ᠰᠤᠶᠤᠯ᠂ ᠤᠷᠠᠯᠢᠭ ᠪᠣᠯᠬᠤ ᠢᠢ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠵᠣᠴᠢᠳ᠂ ᠵᠢᠭᠤᠯᠴᠢᠳ ᠮᠢᠨᠢ ᠳᠡᠷᠭᠡᠳᠡ ᠡᠴᠡ ᠨᠢ ᠬᠠᠷᠠᠵᠤ᠂ ᠮᠡᠳᠡᠷᠡᠭᠡᠰᠡᠢ ᠭᠡᠵᠦ ᠮᠣᠩᠭ᠋᠋ᠣᠯ ᠨᠠᠭᠠᠳᠤᠮᠴᠢᠳ ᠬᠦᠰᠡᠵᠦ ᠪᠠᠢᠢᠨᠠ᠃
ᠮᠣᠩᠭ᠋᠋ᠣᠯ ᠤᠯᠤᠰ ᠲᠤ ᠵᠣᠷᠢᠨ ᠢᠷᠡᠭᠰᠡᠨ ᠭᠠᠳᠠᠭᠠᠳᠤ ᠢᠢᠨ ᠵᠢᠭᠤᠯᠴᠢᠳ᠂ ᠠᠨᠳᠠ ᠨᠥᠬᠥᠳ ᠲᠥ ᠪᠡᠨ ᠮᠣᠩᠭ᠋᠋ᠣᠯ ᠨᠠᠭᠠᠳᠤᠮ ᠤᠨ ᠮᠡᠨᠳᠦ ᠢᠢ ᠲᠤᠰᠬᠠᠢᠢᠯᠠᠨ ᠳᠡᠪᠰᠢᠭᠦᠯᠦᠶᠡ᠃ ᠲᠠ ᠪᠦᠬᠦᠨ ᠮᠣᠩᠭ᠋᠋ᠣᠯ ᠤᠨ ᠰᠠᠢᠢᠬᠠᠨ ᠣᠷᠣᠨ ᠳᠤ ᠮᠢᠨᠢ ᠲᠠᠪᠠ ᠲᠤᠬᠠ ᠲᠠᠢ ᠠᠶᠠᠯᠠᠵᠤ᠂ ᠶᠡᠬᠡ ᠢᠢ ᠦᠵᠡᠵᠦ ᠬᠠᠷᠠᠭᠠᠷᠠᠢ᠃ ᠠᠬᠢᠨ ᠳᠠᠬᠢᠨ ᠢᠷᠡᠵᠦ ᠪᠠᠢᠢᠭᠠᠷᠠᠢ᠃ ᠮᠣᠩᠭ᠋᠋ᠣᠯᠴᠤᠳ ᠲᠠ ᠪᠦᠬᠦᠨ ᠢ ᠬᠡᠵᠢᠶᠡ ᠳᠥ ᠨᠠᠢᠢᠷᠰᠠᠭ ᠢᠶᠠᠷ ᠬᠦᠯᠢᠶᠡᠨ ᠠᠪᠬᠤ ᠪᠣᠯᠤᠨᠠ᠃
ᠢᠩᠭᠢᠭᠡᠳ ᠦᠨᠳᠦᠰᠦᠨ ᠦ ᠶᠡᠬᠡ ᠪᠠᠶᠠᠷ ᠴᠡᠩᠭᠡᠯ – ᠮᠣᠩᠭ᠋ᠤᠯ ᠨᠠᠭᠠᠳᠤᠮ ᠡᠬᠢᠯᠡᠵᠦ ᠪᠠᠢᠢᠭᠠ ᠢᠢ ᠲᠠ ᠪᠦᠬᠦᠨ ᠳᠥ ᠳᠠᠭᠤᠯᠭᠠᠶᠠ᠃
ᠮᠣᠷᠢᠳ ᠪᠦᠬᠦᠨ ᠬᠤᠷᠳᠤᠨ ᠪᠠᠢᠢᠭ᠂ ᠰᠤᠮᠤ ᠪᠦᠷ ᠮᠡᠷᠭᠡᠨ ᠲᠤᠰᠠᠭ᠂ ᠪᠥᠬᠡ ᠪᠣᠯᠭᠠᠨ ᠪᠢᠷᠠ ᠲᠠᠢ ᠪᠠᠢᠢᠭ᠃
ᠮᠥᠩᠬᠡ ᠲᠩᠷᠢ ᠢᠢᠨ ᠬᠦᠴᠦᠨ ᠳᠣᠷ ᠮᠣᠩᠭ᠋᠋ᠣᠯ ᠨᠠᠭᠠᠳᠤᠮ ᠥᠨᠢᠳᠡ ᠣᠷᠣᠰᠢᠭ ᠡ᠃
ᠥᠯᠵᠡᠢ ᠵᠢᠷᠭᠠᠯᠠᠩ ᠡᠭᠦᠷᠢᠳᠡ ᠤᠷᠲᠤ ᠳᠤ ᠨᠡᠮᠡᠭᠳᠡᠬᠦ ᠪᠣᠯᠲᠤᠭᠠᠢ》 ᠭᠡᠯᠡ᠃
ᠮᠣᠩᠭ᠋᠋ᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠬ ∙ ᠪᠠᠲᠤᠲᠤᠯᠭᠠ ᠦᠭᠡ ᠬᠡᠯᠡᠵᠦ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭᠠ ᠲᠥᠷᠥ ᠢᠢᠨ ᠢᠢᠰᠦᠨ ᠬᠥᠯᠲᠦ᠂ ᠴᠠᠭᠠᠨ ᠲᠤᠭ ᠳᠤ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠦᠭᠰᠡᠨ ᠢᠶᠡᠷ ᠦᠨᠳᠦᠰᠦᠨ ᠦ ᠶᠡᠬᠡ ᠪᠠᠶᠠᠷ ᠨᠠᠭᠠᠳᠤᠮ ᠠᠯᠪᠠᠨ ᠶᠣᠰᠣᠭᠠᠷ ᠡᠬᠢᠯᠡᠪᠡ᠃ ᠲᠥᠷᠥ ᠢᠢᠨ ᠲᠡᠷᠢᠭᠦᠨ ᠦᠨᠳᠦᠰᠦᠨ ᠦ ᠶᠡᠬᠡ ᠪᠠᠶᠠᠷ ᠨᠠᠭᠠᠳᠤᠮ ᠤᠨ ᠨᠡᠭᠡᠭᠡᠯᠲᠡ ᠢᠢᠨ ᠦᠢᠯᠡ ᠠᠵᠢᠯᠯᠠᠭᠠ ᠢᠢ ᠦᠵᠡᠵᠦ ᠪᠠᠢᠢᠨᠠ᠃
