ᠠᠷᠪᠡᠨ ᠳᠣᠯᠤᠳᠤᠭᠠᠷ ᠵᠢᠷᠠᠨ ᠤ ᠰᠢᠷᠠᠭᠴᠢᠨ ᠭᠠᠬᠠᠢ ᠵᠢᠯ ᠦᠨ ᠡᠪᠦᠯ ᠦᠨ ᠲᠡᠷᠢᠭᠦᠨ ᠬᠥᠬᠡᠭ᠍ᠴᠢᠨ ᠭᠠᠬᠠᠢ ᠰᠠᠷᠠ ᠢᠢᠨ ᠰᠢᠨᠡ ᠢᠢᠨ ᠨᠢᠭᠡᠨ ᠦ ᠰᠢᠷᠠ ᠯᠤᠤ ᠬᠡᠮᠡᠬᠦ ᠡᠨᠡ ᠡᠳᠦᠷ᠂ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠡᠰᠡᠨᠢᠨ ᠮᠡᠨᠳᠦᠯᠡᠭᠰᠡᠨ ᠡᠪᠦᠯ ᠦᠨ ᠲᠡᠷᠢᠭᠦᠨ ᠰᠠᠷᠠ ᠢᠢᠨ ᠰᠢᠨᠡ ᠢᠢᠨ ᠨᠢᠭᠡᠨ ᠦ ᠮᠣᠷᠢᠨ ᠴᠠᠭ ᠲᠤ ᠲᠥᠷᠦ ᠢᠢᠨ ᠣᠷᠳᠣᠨ ᠤ ᠶᠣᠰᠣᠯᠠᠯ ᠬᠦᠨᠳᠦᠳᠬᠡᠯ ᠦᠨ ᠶᠡᠬᠡ ᠲᠠᠩᠬᠢᠮ ᠳᠤ 《ᠴᠢᠩᠭᠢᠰ ᠬᠠᠭᠠᠨ》 ᠣᠳᠤᠨ ᠭᠠᠷᠳᠠᠭᠤᠯᠬᠤ ᠶᠣᠰᠣᠯᠠᠯ ᠪᠣᠯᠤᠯᠠ᠃
ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠲᠥᠷᠦ ᠢᠢᠨ ᠳᠡᠭᠡᠳᠦ ᠱᠠᠩᠨᠠᠯ᠂ ᠲᠡᠷᠢᠭᠦᠨ ᠵᠡᠷᠭᠡ ᠢᠢᠨ 《ᠴᠢᠩᠭᠢᠰ ᠬᠠᠭᠠᠨ》 ᠣᠳᠣᠨ ᠢ ᠾᠢᠦᠩᠨᠦ ᠷᠣᠺ ᠴᠢᠭᠯᠡᠯ ᠢᠶᠡᠷ ᠪᠦᠲᠦᠭᠡᠯ ᠲᠤᠭᠤᠷᠪᠢᠳᠠᠭ 《The Hu》 ᠪᠤᠶᠤ 《ᠾᠦ᠋》 ᠬᠠᠮᠲᠤᠯᠢᠭ ᠲᠤ ᠣᠯᠭᠤᠬᠤ ᠪᠠᠷ ᠪᠣᠯᠤᠭᠰᠠᠨ ᠪᠥᠭᠡᠳ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠬ.ᠪᠠᠲᠤᠲᠤᠯᠭᠠ ᠥᠨᠥᠳᠥᠷ ᠵᠠᠷᠯᠢᠭ ᠭᠠᠷᠭᠠᠭᠰᠠᠨ ᠢ ᠴᠤᠭᠯᠠᠭᠰᠠᠨ ᠵᠣᠴᠢᠳ᠂ ᠲᠥᠯᠦᠭᠡᠯᠡᠭᠴᠢᠳ ᠲᠥ ᠤᠩᠰᠢᠵᠤ ᠰᠣᠨᠣᠷᠳᠠᠭᠤᠯᠪᠠ᠃
ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠢᠢᠨ 《ᠾᠦ᠋》 ᠬᠠᠮᠲᠤᠯᠢᠭ ᠢ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠲᠥᠷᠥ ᠢᠢᠨ ᠳᠡᠭᠡᠳᠦ ᠱᠠᠩᠨᠠᠯ᠂ ᠲᠡᠷᠢᠭᠦᠨ ᠵᠡᠷᠭᠡ ᠢᠢᠨ ᠣᠳᠣᠨ -《ᠴᠢᠩᠭᠢᠰ ᠬᠠᠭᠠᠨ》 ᠣᠳᠣᠨ ᠢᠶᠠᠷ ᠱᠠᠩᠨᠠᠬᠤ ᠲᠤᠬᠠᠢ ᠵᠠᠷᠯᠢᠭ ᠲᠤ᠄
ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠦᠨᠳᠦᠰᠦᠨ ᠬᠠᠤᠯᠢ ᠢᠢᠨ ᠭᠤᠴᠢᠨ ᠭᠤᠷᠪᠠᠳᠤᠭᠠᠷ ᠵᠦᠢᠯ ᠦᠨ 1 ᠳ᠋ᠡᠬᠢ ᠬᠡᠰᠡᠭ ᠦᠨ 7 ᠳᠠᠬᠢ ᠵᠢᠭᠠᠯᠲᠠ᠂ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠢᠢᠨ ᠲᠤᠬᠠᠢ ᠬᠠᠤᠯᠢ ᠢᠢᠨ 15 ᠳ᠋ᠤᠭᠠᠷ ᠵᠦᠢᠯ ᠦᠨ 1 ᠳ᠋ᠡᠬᠢ ᠬᠡᠰᠡᠭ ᠲᠥ ᠵᠢᠭᠠᠭᠰᠠᠨ ᠢ ᠲᠤᠰ ᠲᠤᠰ ᠦᠨᠳᠦᠰᠦᠯᠡᠨ ᠵᠠᠷᠯᠢᠭ ᠪᠣᠯᠭᠠᠬᠤ ᠨᠢ᠄
ᠲᠤᠯᠭᠤᠷ ᠲᠥᠷᠥ ᠢᠢᠨ 2228 ᠵᠢᠯ᠂ ᠶᠡᠬᠡ ᠮᠣᠩ᠋ᠭᠣᠯ ᠤᠯᠤᠰ ᠪᠠᠢᠢᠭᠤᠯᠤᠭᠳᠠᠰᠤᠨ ᠤ 813 ᠵᠢᠯ᠂ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠮᠡᠨᠳᠦᠯᠡᠭᠰᠡᠨ ᠦ 857 ᠵᠢᠯ ᠦᠨ ᠣᠢ – ᠮᠣᠩ᠋ᠭᠣᠯ ᠪᠠᠬᠠᠷᠬᠠᠯ ᠤᠨ ᠡᠳᠦᠷ ᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠮᠣᠩ᠋ᠭᠣᠯ ᠤᠨ ᠶᠡᠬᠡ ᠡᠵᠡᠨᠲᠦ ᠭᠦᠷᠦᠨ᠂ ᠡᠪᠦᠭᠡ ᠳᠡᠭᠡᠳᠦᠰ ᠦᠨ ᠢᠶᠡᠨ ᠰᠤᠤ ᠠᠯᠳᠠᠷ᠂ ᠪᠠᠬᠠᠷᠬᠠᠯᠳᠤ ᠲᠡᠦᠬᠡ᠂ ᠦᠨᠳᠦᠰᠦᠨ ᠦ ᠤᠯᠠᠮᠵᠢᠯᠠᠯᠲᠤ ᠤᠷᠠᠯᠢᠭ ᠤᠨ ᠢᠶᠠᠨ ᠳᠤᠮᠳᠠᠷᠠᠰᠢ ᠦᠭᠡᠢ ᠥᠪ ᠰᠤᠶᠤᠯ ᠢ ᠣᠷᠴᠢᠨ ᠦᠶᠡ ᠢᠢᠨ ᠬᠥᠭ᠍ᠵᠢᠮ ᠦᠨ ᠬᠡᠮᠨᠡᠯ᠂ ᠬᠥᠭ᠌ ᠠᠶᠠᠯᠭᠤᠨ ᠳᠤ ᠨᠡᠢᠢᠴᠡᠭᠦᠯᠦᠨ 《ᠾᠦᠩᠨᠦ ᠷᠣᠺ》 ᠬᠥᠭ᠍ᠵᠢᠮ ᠦᠨ ᠰᠢᠨᠡ ᠤᠷᠤᠰᠬᠠᠯ ᠢ ᠪᠤᠢ ᠪᠣᠯᠭᠠᠵᠤ᠂ ᠡᠬᠡ ᠬᠡᠯᠡ ᠪᠡᠷ ᠢᠶᠡᠨ ᠲᠤᠭᠤᠷᠪᠢᠭᠰᠠᠨ ᠤᠷᠠᠨ ᠪᠦᠲᠦᠭᠡᠯ ᠢᠶᠡᠨ ᠳᠡᠯᠡᠬᠡᠢ ᠳᠠᠬᠢᠨᠠ ᠰᠤᠷᠲᠠᠯᠴᠢᠯᠠᠨ ᠲᠦᠭᠡᠭᠡᠵᠦ᠂ ᠮᠣᠩ᠋ᠭᠣᠯ ᠤᠯᠤᠰ᠂ ᠮᠣᠩ᠋ᠭᠣᠯ ᠬᠦᠮᠦᠨ ᠦ ᠨᠡᠷᠡ ᠬᠦᠨᠳᠦ ᠢᠢ ᠥᠨᠳᠥᠷ ᠲᠥ ᠡᠷᠭᠦᠵᠦ ᠪᠤᠢ ᠢᠢ ᠦᠨᠡᠯᠡᠵᠦ᠂ ᠷᠣᠺ ᠬᠥᠭ᠍ᠵᠢᠮ ᠦᠨ 《ᠾᠦ᠋》 ᠬᠠᠮᠲᠤᠯᠢᠭ ᠢ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠲᠥᠷᠥ ᠢᠢᠨ ᠳᠡᠭᠡᠳᠦ ᠱᠠᠩᠨᠠᠯ᠂ ᠲᠡᠷᠢᠭᠦᠨ ᠵᠡᠷᠭᠡ ᠢᠢᠨ ᠣᠳᠣᠨ -《ᠴᠢᠩᠭᠢᠰ ᠬᠠᠭᠠᠨ》 ᠣᠳᠣᠨ ᠢᠶᠠᠷ ᠱᠠᠩᠨᠠᠰᠤᠭᠠᠢ》 ᠭᠡᠵᠡᠢ᠃
ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠢᠢᠨ ᠵᠠᠷᠯᠢᠭ ᠢ ᠤᠩᠰᠢᠵᠤ ᠰᠣᠨᠣᠷᠳᠠᠭᠤᠯᠤᠭᠰᠠᠨ ᠤ ᠳᠠᠷᠠᠭᠠ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠬ.ᠪᠠᠲᠤᠲᠤᠯᠭᠠ《ᠴᠢᠩᠭᠢᠰ ᠬᠠᠭᠠᠨ》 ᠣᠳᠣᠨ ᠢ 《ᠾᠦ᠋》 ᠬᠠᠮᠲᠤᠯᠢᠭ ᠤᠨ ᠲᠥᠯᠥᠭᠡᠯᠡᠯ ᠪᠣᠯᠭᠠᠨ ᠫᠷᠣᠳᠢᠶᠦ᠋ᠰᠧᠷ ᠪ.ᠳᠠᠰᠢᠳᠣᠩᠳᠣᠭ ᠲᠤ ᠭᠠᠷᠳᠠᠭᠤᠯᠤᠯᠠ᠃
ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠬ.ᠪᠠᠲᠤᠲᠤᠯᠭᠠ 《ᠾᠦ᠋》 ᠬᠠᠮᠲᠤᠯᠢᠭ ᠲᠤ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠲᠥᠷᠥ ᠢᠢᠨ ᠳᠡᠭᠡᠳᠦ ᠱᠠᠩᠨᠠᠯ᠂ ᠲᠡᠷᠢᠭᠦᠨ ᠵᠡᠷᠭᠡ ᠢᠢᠨ ᠣᠳᠣᠨ -《ᠴᠢᠩᠭᠢᠰ ᠬᠠᠭᠠᠨ》 ᠣᠳᠣᠨ ᠭᠠᠷᠳᠠᠭᠤᠯᠬᠤ ᠪᠣᠯᠤᠭᠰᠠᠨ ᠲᠠᠯᠠ ᠪᠠᠷ ᠢᠶᠠᠨ᠄
ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠢᠷᠭᠡᠳ ᠡ᠂
ᠳᠡᠯᠡᠬᠡᠢ ᠳᠠᠶᠠᠭᠠᠷ ᠲᠤ ᠲᠠᠷᠬᠠᠨ ᠰᠠᠭᠤᠷᠢᠰᠢᠭᠰᠠᠨ ᠮᠣᠩ᠋ᠭᠣᠯᠴᠤᠳ ᠠ᠋᠂
ᠡᠵᠡᠨ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ ᠮᠡᠯᠮᠡᠢ ᠭᠡᠢᠢᠭᠰᠡᠨ ᠦ 857 ᠵᠢᠯ ᠦᠨ ᠣᠢ – ᠮᠣᠩ᠋ᠭᠣᠯ ᠪᠠᠬᠠᠷᠬᠠᠯ ᠤᠨ ᠡᠳᠦᠷ ᠦᠨ ᠬᠠᠯᠠᠭᠤᠨ ᠳᠣᠲᠣᠨᠣ ᠮᠡᠨᠳᠦ ᠢᠢ ᠲᠠ ᠪᠦᠬᠦᠨ ᠳᠥ ᠪᠡᠨ ᠡᠷᠭᠦᠨ ᠳᠡᠪᠰᠢᠭᠦᠯᠦᠶᠡ᠃
ᠣᠨ ᠴᠠᠭ ᠤᠨ ᠤᠷᠤᠰᠬᠠᠯ ᠳᠤ ᠣᠯᠠᠨ ᠲᠡᠦᠬᠡᠨ ᠬᠦᠮᠦᠰ᠂ ᠲᠡᠦᠬᠡᠲᠦ ᠦᠢᠯᠡ ᠶᠠᠪᠤᠳᠠᠯ ᠤᠳ ᠪᠦᠳᠡᠭᠢᠷᠡᠨ᠂ ᠮᠠᠷᠲᠠᠭᠳᠠᠨ ᠠᠯᠤᠰᠷᠠᠵᠤ ᠪᠠᠢᠢᠬᠤ ᠳᠤ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠮᠠᠨᠢ ᠠᠯᠳᠠᠷ ᠭᠠᠪᠢᠶᠠ ᠢᠢ ᠬᠦᠮᠦᠨ ᠲᠥᠷᠦᠯᠬᠢᠲᠡᠨ ᠤᠯᠠᠮ ᠪᠦᠷᠢ ᠲᠣᠳᠣᠷᠠᠭᠤᠯᠤᠨ᠂ ᠣᠨᠴᠠᠯᠠᠭᠰᠠᠭᠠᠷ ᠪᠠᠢᠢᠭᠠ ᠪᠢᠯᠡ᠃ ᠭᠧᠷᠮᠠᠨ ᠤ ᠠᠤᠭᠠ ᠹᠢᠯᠣᠰᠣᠹᠢᠴᠢ ᠭᠧᠣᠷᠭ ᠾᠸᠭᠧᠯᠢ 1837 ᠣᠨ ᠳᠤ ᠪᠢᠴᠢᠭᠰᠡᠨ 《ᠲᠡᠦᠬᠡᠨ ᠹᠢᠯᠣᠰᠣᠹᠢ》 ᠪᠦᠲᠦᠭᠡᠯ ᠳᠥ ᠪᠡᠨ 《ᠬᠦᠮᠦᠨ ᠲᠥᠷᠦᠯᠬᠢᠲᠡᠨ ᠦ ᠲᠡᠦᠬᠡ ᠮᠣᠩ᠋ᠭᠣᠯᠴᠤᠳ ᠲᠠᠢ ᠬᠠᠮᠲᠤ ᠡᠬᠢᠯᠡᠭᠰᠡᠨ ᠶᠤᠮ᠃ ᠴᠤᠬᠤᠮ ᠳᠠᠭᠠᠨ ᠮᠣᠩ᠋ᠭᠣᠯᠴᠤᠳ ᠲᠡᠦᠬᠡᠨ ᠳ᠋ᠡᠬᠢ ᠠᠩᠬᠠᠨ ᠤ ᠬᠠᠤᠯᠢ ᠴᠠᠭᠠᠵᠠᠲᠤ ᠬᠦᠴᠦᠲᠦ ᠲᠥᠷᠦ ᠢᠢᠨ ᠰᠠᠭᠤᠷᠢ ᠢᠢ ᠪᠠᠢᠢᠭᠤᠯᠵᠤ ᠴᠢᠳᠠᠭᠰᠠᠨ ᠦᠨᠳᠦᠰᠦᠲᠡᠨ ᠪᠥᠭᠡᠳ ᠲᠡᠳᠡᠨ ᠦ ᠦᠵᠡᠯ ᠰᠠᠨᠠᠭᠠᠨ ᠤ ᠳᠣᠣᠷᠠ ᠥᠨᠥ ᠢᠢᠨ ᠪᠦᠬᠦᠢ ᠯᠠ ᠶᠡᠬᠡ ᠭᠦᠷᠦᠨ ᠨᠦᠭᠦᠳ᠂ ᠳᠡᠯᠡᠬᠡᠢ ᠢᠢᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠵᠠᠮᠨᠠᠵᠤ ᠶᠠᠪᠤᠭᠠ…》 ᠬᠡᠮᠡᠨ ᠳ᠋ᠦᠩᠨᠡᠨ ᠪᠢᠴᠢᠵᠦ ᠪᠠᠢᠢᠵᠠᠢ᠃
ᠭᠦᠨ ᠤᠬᠠᠭᠠᠨᠲᠠᠨ ᠭ ∙ ᠾᠸᠭᠧᠯᠢ ᠢᠢᠨ ᠳᠤᠷᠠᠳᠤᠭᠰᠠᠨ ᠬᠦᠴᠦᠷᠬᠡᠭ᠌ ᠲᠥᠷᠥ ᠨᠢ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠮᠠᠨᠢ 《ᠠᠯᠳᠠᠠ ᠪᠡᠶᠡ ᠮᠢᠨᠢ ᠠᠯᠵᠢᠶᠠᠪᠠᠰᠤ ᠠᠯᠵᠢᠶᠠᠭ》 ᠬᠡᠮᠡᠨ ᠵᠢᠳᠬᠦᠵᠦ ᠪᠣᠰᠬᠠᠭᠰᠠᠨ 《ᠠᠬᠤ ᠲᠥᠷᠥ – ᠮᠣᠩ᠋ᠭᠣᠯ ᠲᠥᠷᠥ》 ᠪᠠᠢᠢᠭᠰᠠᠨ᠃ ᠭᠡᠮ ᠪᠤᠷᠤᠭᠤᠲᠠᠨ ᠳᠤ ᠲᠠᠭᠠᠷᠠᠬᠤ ᠬᠠᠷᠢᠭᠤᠴᠠᠯᠭᠠ ᠢᠢ ᠨᠣᠭᠳᠠᠭᠤᠯᠬᠤ᠂ ᠭᠠᠪᠢᠶᠠᠲᠠᠨ ᠳᠤ ᠵᠣᠬᠢᠬᠤ ᠱᠠᠩᠨᠠᠯ ᠢ ᠣᠯᠭᠤᠬᠤ ᠨᠢ ᠲᠥᠷᠦ ᠢᠢᠨ ᠨᠢᠭᠡᠨ ᠴᠢᠬᠤᠯᠠ ᠡᠭᠦᠷᠭᠡ ᠬᠡᠮᠡᠨ ᠴᠢᠩᠭᠢᠰ ᠬᠠᠭᠠᠨ ᠦᠵᠡᠳᠡᠭ ᠪᠠᠢᠢᠯᠠ᠃
ᠮᠣᠩ᠋ᠭᠣᠯ ᠤᠨ ᠲᠥᠷᠥ ᠥᠨᠥᠳᠥᠷ ᠭᠠᠪᠢᠶᠠᠲᠠᠨ ᠨᠤᠭᠤᠳ ᠢᠶᠠᠨ ᠱᠠᠩᠨᠠᠨ ᠠᠯᠳᠠᠷᠰᠢᠭᠤᠯᠵᠤ ᠪᠠᠢᠢᠨᠠ᠃
ᠮᠣᠩ᠋ᠭᠣᠯᠴᠤᠳ ᠠ᠌᠂
ᠰᠤᠤᠲᠤ ᠪᠣᠭᠳᠠ ᠳᠡᠭᠡᠳᠦᠰ ᠦᠨ ᠮᠡᠨᠳᠦᠯᠡᠭᠰᠡᠨ – ᠮᠣᠩ᠋ᠭᠣᠯ ᠪᠠᠬᠠᠷᠬᠠᠯ ᠤᠨ ᠡᠨᠡ ᠡᠳᠦᠷ ᠶᠡᠬᠡ ᠬᠠᠭᠠᠨ ᠤ ᠪᠠᠨ ᠬᠦᠷᠦᠭᠡ ᠦᠭᠡᠢ᠂ ᠳᠥᠲᠡᠯᠡᠭᠡ ᠦᠭᠡᠢ ᠭᠠᠵᠠᠷ ᠲᠤ ᠬᠦᠷᠴᠦ᠂ ᠮᠣᠩ᠋ᠭᠣᠯ ᠤᠨ ᠠᠯᠳᠠᠷ ᠰᠤᠤ᠂ ᠮᠣᠩ᠋ᠭᠣᠯ ᠤᠨ ᠰᠤᠶᠤᠯ ᠤᠨ ᠥᠪ ᠢ ᠲᠦᠭᠡᠭᠡᠵᠦ᠂ ᠮᠣᠩ᠋ᠭᠣᠯ ᠬᠡᠮᠡᠬᠦ ᠨᠡᠷᠡ ᠢᠢ ᠶᠢᠷᠲᠢᠨᠴᠦ ᠢᠢᠨ ᠴᠢᠬᠢᠨᠡ ᠳᠠᠭᠤᠷᠢᠰᠬᠠᠵᠤ ᠶᠠᠪᠤᠭᠠ 《ᠾᠦᠩᠨᠦ ᠷᠣᠺ》 ᠬᠡᠮᠡᠬᠦ ᠰᠢᠨᠡ ᠷᠣᠺ ᠪᠠᠷᠢᠯ ᠢ ᠡᠭᠦᠰᠬᠡᠨ᠂ ᠭᠢᠯᠠᠯᠵᠠᠵᠤ ᠪᠤᠢ 《ᠾᠦ᠋》 ᠬᠠᠮᠲᠤᠯᠢᠭ ᠲᠤ ᠣᠯᠭᠤᠬᠤ ᠪᠠᠷ ᠰᠢᠢᠳᠪᠦᠷᠢᠯᠡᠯᠡ!
ᠪᠢ ᠲᠠ ᠨᠠᠷ ᠢᠶᠠᠷ ᠪᠠᠬᠠᠷᠬᠠᠵᠤ ᠪᠠᠢᠢᠨᠠ᠃ ᠮᠣᠩ᠋ᠭᠣᠯ ᠲᠦᠮᠡᠨ ᠲᠠ ᠨᠠᠷ ᠢᠶᠠᠷ ᠣᠮᠣᠭᠰᠢᠨ ᠪᠠᠶᠠᠰᠴᠤ ᠪᠠᠢᠢᠨᠠ᠃ ᠶᠡᠬᠡ ᠨᠠᠢᠢᠷᠠᠭᠴᠢ ᠷ ∙ ᠴᠣᠢᠢᠨᠠᠮ ᠤᠨ 《ᠮᠢᠨᠦ ᠮᠣᠩ᠋ᠭᠣᠯ》 ᠨᠠᠢᠢᠷᠠᠭᠯᠠᠯ ᠳᠤ ᠦᠭᠦᠯᠡᠭᠰᠡᠨᠴᠢᠯᠡᠨ ᠮᠣᠩ᠋ᠭᠣᠯ ᠤᠨ ᠳᠠᠭᠤᠤ ᠪᠣᠯ ᠮᠣᠲ᠋ᠣᠷ ᠤᠨ ᠴᠢᠮᠡᠭᠡ ᠪᠢᠰᠢ᠂ ᠮᠣᠷᠢᠲᠠᠨ ᠠᠷᠠᠳ ᠤᠨ ᠰᠡᠳᠬᠢᠯ ᠦᠨ ᠤᠶᠠᠩ᠋ᠭᠠ ᠪᠣᠯᠬᠤ ᠢᠢ ᠳᠡᠯᠡᠬᠡᠢ ᠳᠠᠬᠢᠨ ᠳᠤ ᠨᠣᠲᠠᠯᠠᠨ ᠬᠠᠷᠠᠭᠤᠯᠤᠭᠰᠠᠨ ᠳᠤ ᠴᠢᠨᠢ ᠪᠠᠶᠠᠷᠯᠠᠯᠠ᠃
ᠡᠨᠡ ᠪᠣᠯ ᠨᠡᠭᠦᠳᠡᠯᠴᠢᠨ ᠤᠳᠤᠮ ᠤᠨ ᠮᠣᠩ᠋ᠭᠣᠯ ᠵᠠᠯᠠᠭᠤᠰ ᠤᠨ ᠬᠠᠮᠲᠤ ᠢᠢᠨ ᠬᠦᠴᠦ᠂ ᠬᠠᠮᠲᠤ ᠢᠢᠨ ᠵᠢᠳᠬᠦᠯ᠂ ᠬᠠᠮᠲᠤ ᠢᠢᠨ ᠠᠮᠵᠢᠯᠲᠠ ᠶᠤᠮ᠃ ᠶᠡᠷᠦᠩᠬᠡᠢ ᠫᠷᠣᠳᠢᠶᠦ᠋ᠰᠧᠷ᠂ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠭᠠᠪᠢᠶᠠᠲᠤ ᠵᠦᠵᠦᠭᠡᠴᠢᠨ ᠪᠠᠶᠠᠷᠮᠠᠩᠨᠠᠢ ᠢᠢᠨ ᠳᠠᠰᠢᠳᠣᠨᠳᠣᠭ ᠲᠡᠷᠢᠭᠦᠲᠡᠢ 《ᠾᠦ᠋》 ᠬᠠᠮᠲᠤᠯᠢᠭ᠃ ᠭᠡᠰᠢᠭᠦᠳ ᠴᠡᠩᠳᠦᠪᠠᠭᠠᠲᠤᠷ ᠤᠨ ᠭᠠᠯᠪᠠᠳᠠᠷᠠᠬᠤ᠂ ᠪᠠᠲᠤᠰᠠᠢᠢᠬᠠᠨ ᠤ ᠡᠩᠬᠡᠰᠠᠢᠢᠬᠠᠨ᠂ ᠭᠠᠯᠰᠠᠩᠵᠠᠮᠴᠤ ᠢᠢᠨ ᠨᠢᠮᠠᠵᠠᠨᠵᠠᠨ᠂ ᠨᠠᠷᠠᠨᠪᠠᠭᠠᠲᠤᠷ ᠤᠨ ᠲᠡᠮᠡᠦᠯᠦᠨ᠂ ᠭᠠᠩᠲᠡᠮᠦᠷ ᠦᠨ ᠣᠳᠤᠪᠠᠶᠠᠷ᠂ ᠠᠶᠤᠰᠢᠵᠠᠪ ᠤᠨ ᠵᠠᠮᠪᠠᠯᠳᠣᠷᠵᠢ᠂ ᠮᠠᠷᠠᠯᠬᠦ᠋ᠦ ᠢᠢᠨ ᠥᠨᠥᠮᠥ᠋ᠩᠬᠡ᠂ ᠪᠠᠲᠤᠪᠠᠶᠠᠷ ᠤᠨ ᠪᠠᠲᠤᠬᠦᠦ᠂ ᠴᠡᠩᠳᠦᠪᠠᠭᠠᠲᠤᠷ ᠤᠨ ᠨᠠᠳᠮᠢᠳᠲᠤᠯᠭᠠ᠂ ᠪᠷᠧᠨ᠋ᠳᠣᠨ ᠹᠷᠠᠢᠢᠽᠧᠨ ᠲᠠ ᠪᠦᠬᠦᠨ ᠳᠥ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠣᠳᠣᠨ ᠢ ᠮᠣᠩ᠋ᠭᠣᠯ ᠲᠦᠮᠡᠨ ᠦ ᠨᠡᠷᠡ ᠢᠢᠨ ᠡᠮᠦᠨᠡ ᠡᠴᠡ ᠭᠠᠷᠳᠠᠭᠤᠯᠵᠤ ᠪᠠᠢᠢᠨᠠ᠃
《ᠾᠦ᠋》 ᠬᠠᠮᠲᠤᠯᠢᠭ ᠤᠨ ᠬᠢᠨ ᠡᠬᠢᠨ ᠦ ᠴᠣᠮᠣᠭ ᠢᠶᠠᠨ 《ᠭᠡᠷᠡᠭᠡ》 ᠍ ᠪᠡᠷ ᠨᠡᠷᠡᠯᠡᠭᠰᠡᠨ ᠨᠢ ᠦᠨᠡᠬᠡᠷ ᠣᠨᠣᠵᠠᠢ᠃ ᠲᠠ ᠪᠦᠬᠦᠨ ᠦ ᠤᠷᠠᠨ ᠪᠦᠲᠦᠭᠡᠯ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠰᠣᠶᠣᠷᠬᠠᠭᠰᠠᠨ 《ᠠᠯᠲᠠᠨ ᠭᠡᠷᠡᠭᠡ》 ᠠᠳᠠᠯᠢ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠮᠣᠩ᠋ᠭᠣᠯ ᠤᠨ ᠨᠡᠷᠡ ᠢᠢ ᠲᠦᠭᠡᠭᠡᠨ᠂ ᠬᠦᠮᠦᠰ ᠦᠨ ᠰᠡᠳᠬᠢᠯ ᠳᠥ ᠨᠡᠪᠲᠡᠷᠡᠵᠦ ᠪᠠᠢᠢᠨᠠ᠃ ᠲᠠ ᠨᠠᠷ ᠤᠨ ᠵᠠᠮ ᠮᠥᠷ ᠲᠣᠳᠣ ᠪᠠᠢᠢᠵᠤ᠂ ᠣᠯᠠᠨ ᠵᠠᠯᠠᠭᠤᠰ᠂ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠢ ᠳᠠᠭᠠᠭᠤᠯᠤᠨᠠ ᠬᠡᠮᠡᠨ ᠪᠢ ᠶᠡᠬᠡᠳᠡ ᠪᠡᠯᠭᠡᠰᠢᠶᠡᠨ᠂ ᠢᠲᠡᠭᠡᠵᠦ ᠪᠠᠢᠢᠨᠠ᠃
ᠮᠣᠩ᠋ᠭᠣᠯ ᠤᠨ 《ᠾᠦᠩᠨᠦ ᠷᠣᠺ》 – 《ᠾᠦ᠋》 ᠬᠠᠮᠲᠤᠯᠢᠭ ᠤᠨ ᠠᠩᠬᠠᠨ ᠤ ᠳᠠᠭᠤᠤ ᠢᠨ᠋ᠲ᠋ᠧᠷᠨᠡᠲ ᠣᠷᠴᠢᠨ ᠳᠤ ᠨᠢᠭᠡ ᠵᠢᠯ ᠦᠨ ᠳᠣᠲᠣᠷᠠ 26 ᠰᠠᠶᠠ ᠰᠣᠨᠣᠰᠤᠭᠴᠢᠳ ᠲᠤ ᠬᠦᠷᠴᠦ᠂ ᠡᠳᠦᠷ ᠡᠴᠡ ᠡᠳᠦᠷ ᠲᠥ ᠲᠣᠭᠠ ᠨᠢ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠢᠨᠠ᠃ 2019 ᠣᠨ ᠤ 6 ᠳ᠋ᠤᠭᠠᠷ ᠰᠠᠷᠠ ᠠᠴᠠ ᠲᠤᠰ ᠬᠠᠮᠲᠤᠯᠢᠭ ᠧᠦ᠋ᠷᠣᠫᠠ ᠢᠢᠨ 13 ᠣᠷᠣᠨ ᠤ 23 ᠨᠠᠭᠠᠳᠤᠮ ᠢᠶᠠᠷ ᠠᠶᠠᠯᠠᠨ ᠲᠣᠭᠯᠠᠯᠲᠠ ᠬᠢᠵᠡᠢ᠃ ᠣᠳᠣ ᠠᠮᠧᠷᠢᠺᠠ ᠢᠢᠨ ᠨᠢᠭᠡᠳᠦᠭᠰᠡᠨ ᠤᠯᠤᠰ᠂ ᠮᠥᠨ ᠺᠠᠨᠠᠳ᠋ ᠤᠯᠤᠰ ᠢᠶᠠᠷ ᠲᠣᠭᠣᠷᠢᠨ 60 ᠣᠷᠴᠢᠮ ᠪᠡᠶᠡ ᠳᠠᠭᠠᠭᠠᠭᠰᠠᠨ ᠲᠣᠭᠯᠠᠯᠲᠠ ᠬᠢᠭᠡᠳ ᠶᠠᠪᠤᠵᠤ ᠪᠠᠢᠢᠭᠠ ᠶᠤᠮ ᠪᠠᠢᠢᠨᠠ᠃
ᠲᠠ ᠪᠦᠬᠦᠨ ᠳᠥ ᠡᠨᠡ ᠬᠦᠨᠳᠦᠳᠦ ᠱᠠᠩᠨᠠᠯ ᠢ ᠣᠯᠭᠣᠬᠤ ᠮᠥᠴᠡ ᠳᠥ ᠨᠠᠳᠠ ᠳᠤ 1965 ᠣᠨ ᠤ 5 ᠳ᠋ᠤᠭᠠᠷ ᠰᠠᠷᠠ ᠳᠤ ᠠᠯᠳᠠᠷᠲᠤ 《ᠪᠢᠲ᠋ᠯᠽ》 ᠬᠠᠮᠲᠤᠯᠢᠭ ᠲᠤ ᠪᠷᠢᠲ᠋ᠠᠨ ᠤ ᠡᠵᠡᠨᠳᠥ ᠭᠦᠷᠦᠨ ᠦ ᠰᠢᠯᠢᠳᠡᠭ ᠭᠠᠪᠢᠶᠠᠨ ᠤ ᠣᠳᠣᠨ ᠭᠠᠷᠳᠠᠭᠤᠯᠤᠭᠰᠠᠨ ᠶᠠᠪᠤᠳᠠᠯ ᠰᠠᠨᠠᠭᠠᠨ ᠳᠤ ᠣᠷᠣᠵᠤ ᠪᠡᠢᠢᠨᠠ᠃ ᠠᠩᠯᠢ ᠢᠢᠨ ᠬᠠᠲᠤᠨ ᠬᠠᠭᠠᠨ 《ᠪᠢᠲ᠋ᠯᠽ》 ᠬᠠᠮᠲᠤᠯᠢᠭ ᠲᠤ ᠱᠠᠩᠨᠠᠯ ᠣᠯᠭᠣᠬᠤ ᠪᠣᠯᠤᠭᠰᠠᠨ ᠰᠢᠯᠲᠠᠭᠠᠨ ᠢᠶᠠᠨ 《ᠪᠷᠢᠲ᠋ᠠᠨ ᠤ ᠨᠡᠷᠡ ᠬᠦᠨᠳᠦ ᠢᠢ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠲᠤ ᠥᠰᠬᠡᠭ᠍ᠰᠡᠨ ᠦ ᠲᠥᠯᠥᠭᠡ》 ᠬᠡᠮᠡᠨ ᠲᠠᠢᠢᠯᠪᠤᠷᠢᠯᠠᠵᠤ ᠪᠠᠢᠢᠭᠰᠠᠨ᠃ ᠥᠨᠥᠳᠥᠷ ᠮᠣᠩ᠋ᠭᠣᠯ ᠤᠨ ᠲᠥᠷᠥ ᠲᠠ ᠪᠦᠬᠦᠨ ᠢ ᠲᠥᠷᠥ ᠢᠢᠨ ᠳᠡᠭᠡᠳᠦ ᠱᠠᠩᠨᠠᠯ ᠲᠡᠷᠢᠭᠦᠨ ᠵᠡᠷᠭᠡ ᠢᠢᠨ ᠣᠳᠣᠨ 《ᠴᠢᠩᠭᠢᠰ ᠬᠠᠭᠠᠨ》 ᠣᠳᠣᠨ ᠢᠶᠠᠷ ᠱᠠᠩᠨᠠᠬᠤ ᠳᠤ ᠪᠠᠨ ᠡᠭᠦᠨ ᠲᠡᠢ ᠢᠵᠢᠯ ᠰᠢᠯᠲᠠᠭᠠᠨ ᠢ ᠳᠤᠷᠠᠳᠬᠤ ᠪᠠᠢᠢᠨᠠ᠃
ᠲᠠ ᠪᠦᠬᠦᠨ ᠳᠥ ᠠᠮᠵᠢᠯᠲᠠ ᠬᠦᠰᠡᠵᠦ᠂ ᠠᠵᠠ ᠵᠢᠷᠭᠠᠯ ᠰᠠᠢᠢᠨ ᠰᠠᠢᠢᠬᠠᠨ ᠪᠦᠬᠦᠨ ᠢ ᠢᠷᠦᠭᠡᠶᠡ᠃
ᠮᠣᠩ᠋ᠭᠣᠯ ᠪᠢᠳᠡᠨ ᠦ ᠬᠡᠢᠢᠮᠣᠷᠢ ᠪᠠᠬᠠᠷᠬᠠᠯ ᠳᠡᠭᠡᠳᠦ ᠲᠩᠷᠢ ᠡᠴᠡ ᠵᠠᠶᠠᠭᠠᠲᠤ ᠲᠦᠷᠦᠭᠰᠡᠨ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠪᠠᠨ ᠰᠤᠤ ᠪᠢᠯᠢᠭ ᠲᠥ ᠪᠢᠰᠢᠷᠡᠨ ᠮᠥᠷᠭᠥᠵᠡᠭᠡᠢᠡ᠃ ᠲᠠᠨ ᠤ ᠡᠭᠦᠰᠬᠡᠨ ᠪᠠᠢᠢᠭᠤᠯᠤᠭᠰᠠᠨ ᠮᠣᠩ᠋ᠭᠣᠯ ᠲᠥᠷᠥ᠂ ᠲᠠᠨ ᠤ ᠰᠦᠯᠳᠡ ᠬᠡᠢᠢᠮᠣᠷᠢ ᠦᠷᠡ ᠬᠣᠢᠢᠴᠢᠰ ᠪᠢᠳᠡᠨ ᠢ ᠪᠡᠨ ᠦᠷᠭᠦᠯᠵᠢᠳᠡ ᠢᠪᠡᠭᠡᠬᠦ ᠪᠣᠯᠲᠤᠭᠠᠢ᠃
ᠮᠥᠩᠬᠡ ᠲᠩᠷᠢ ᠪᠢᠳᠡᠨ ᠢ ᠢᠪᠡᠭᠡᠭ᠌ 》 ᠭᠡᠵᠦ ᠬᠡᠯᠡᠯᠡ᠃
ᠳᠠᠷᠠᠭᠠ ᠨᠢ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠲᠥᠷᠥ ᠢᠢᠨ ᠳᠡᠭᠡᠳᠦ ᠱᠠᠩᠨᠠᠯ᠂ ᠲᠡᠷᠢᠭᠦᠨ ᠵᠡᠷᠭᠡ ᠢᠢᠨ 《ᠴᠢᠩᠭᠢᠰ ᠬᠠᠭᠠᠨ》 ᠣᠳᠣᠨᠳᠤ 《ᠾᠦ᠋》 ᠬᠠᠮᠲᠤᠯᠢᠭ ᠤᠨ ᠫᠷᠣᠳᠢᠶᠦ᠋ᠰᠧᠷ ᠪ.ᠳᠠᠰᠢᠳᠣᠨᠳᠣᠭ᠄
ᠳᠡᠭᠡᠳᠦ ᠬᠥᠬᠡ ᠲᠩᠷᠢ᠂
ᠢᠪᠡᠭᠡᠯᠲᠦ ᠡᠪᠦᠭᠡ ᠳᠡᠭᠡᠳᠦᠰ᠂
ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠮᠢᠨᠢ ᠡ᠂
ᠮᠥᠷ ᠦᠨ ᠵᠡᠷᠭᠡ ᠳᠥ ᠬᠦᠷᠭᠡᠭ᠍ᠳᠡᠵᠦ
ᠲᠥᠷᠥ ᠢᠢᠨ ᠬᠡᠷᠡᠭ ᠲᠥ ᠡᠷᠭᠦᠭ᠍ᠳᠡᠭᠰᠡᠨ ᠳᠥ ᠪᠡᠨ
ᠮᠡᠬᠦᠰ ᠪᠢ ᠲᠠᠯᠠᠷᠬᠠᠵᠤ᠂ ᠨᠢᠭᠡᠨᠲᠡ ᠮᠡᠬᠦᠢᠢᠨ ᠶᠣᠰᠣᠯᠠᠶᠠ᠃
ᠡᠷᠬᠢᠮ ᠬᠦᠨᠳᠦᠳᠦ᠂ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢᠢᠯᠡᠭᠴᠢ ᠬᠠᠯᠲᠠᠮᠠ ᠢᠢᠨ ᠪᠠᠲᠤᠲᠤᠯᠭᠠ ᠲᠠᠨᠠ᠂
ᠡᠷᠬᠢᠮ ᠬᠦᠨᠳᠦᠳᠦ᠂ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠬᠡ ᠬᠤᠷᠠᠯ ᠤᠨ ᠳᠠᠷᠤᠭᠠ ᠭᠣᠮᠪᠣᠵᠠᠪ ᠤᠨ ᠽᠠᠨᠳᠠᠨᠰᠢᠲᠠᠷᠠ ᠲᠠᠨᠠ᠂
ᠡᠷᠬᠢᠮ ᠬᠦᠨᠳᠦᠳᠦ᠂ ᠮᠣᠩ᠋ᠭᠣᠯ ᠤᠯᠤᠰ ᠤᠨ ᠶᠡᠷᠦᠩᠬᠡᠢ ᠰᠠᠢᠢᠳ ᠤᠬᠤᠨᠠ ᠢᠢᠨ ᠬᠦᠷᠦᠯᠰᠦ᠋ᠬᠡ ᠲᠠᠨᠠ
ᠮᠡᠷᠭᠡᠨ ᠰᠠᠢᠢᠳ᠂ ᠰᠡᠴᠡᠨ ᠲᠦᠰᠢᠮᠡᠳ ᠲᠠ ᠪᠦᠬᠦᠨ ᠳᠥ ᠪᠡᠨ ᠬᠣᠶᠠᠷᠠᠨᠲᠠ ᠮᠡᠬᠦᠢᠢᠨ ᠶᠣᠰᠣᠯᠠᠶᠠ᠃
ᠡᠷᠬᠢᠮᠰᠦᠭ ᠮᠣᠩ᠋ᠭᠣᠯ ᠰᠤᠶᠤᠯ ᠤᠨ ᠳᠡᠭᠡᠳᠦ ᠣᠷᠣᠰᠢᠬᠤᠢ᠂ ᠲᠥᠷᠥ ᠶᠣᠰᠣᠨ ᠤ ᠠᠯᠳᠠᠷ ᠬᠦᠨᠳᠦᠳᠬᠡᠯ ᠢ ᠬᠦᠯᠢᠶᠡᠭᠰᠡᠨ ᠨᠣᠮ ᠤᠨ ᠮᠡᠷᠭᠡᠳ᠂ ᠤᠷᠠᠯᠢᠭ ᠤᠨ ᠵᠢᠳᠬᠦᠯᠲᠡᠨ ᠨᠦᠭᠦᠳ᠂ ᠨᠡᠷᠡ ᠴᠤᠲᠠᠢ ᠬᠠᠮᠲᠤᠷᠠᠨ ᠵᠢᠳᠬᠦᠭ᠍ᠴᠢᠳ ᠡ᠂
ᠡᠷᠴᠢ ᠬᠦᠴᠦ᠂ ᠬᠥᠳᠡᠯᠮᠦᠷᠢ ᠵᠢᠳᠬᠦᠯ᠂ ᠪᠢᠷᠠ ᠴᠢᠳᠠᠯ ᠢᠶᠠᠨ ᠭᠠᠢᠢᠬᠠᠭᠤᠯᠵᠤ ᠮᠣᠩ᠋ᠭᠣᠯ ᠢ ᠳᠡᠯᠡᠬᠡᠢ ᠳᠥ ᠲᠠᠮᠠᠭᠠᠯᠠᠭᠰᠠᠨ ᠰᠫᠣᠷᠲ ᠤᠨ ᠳᠡᠪᠵᠢᠭᠡᠨ ᠳᠥ ᠭᠢᠯᠠᠯᠵᠠᠭᠴᠢ ᠬᠦᠴᠦᠲᠡᠨ ᠨᠦᠭᠦᠳ ᠡ᠂
ᠠᠨᠳᠠ ᠨᠠᠢᠢᠵᠠ ᠨᠠᠷ ᠠ᠋᠂
ᠡᠯᠢᠭᠡ ᠨᠢᠭᠡᠲᠦ ᠮᠣᠩ᠋ᠭᠣᠯ ᠠᠬᠠᠨ ᠳᠡᠭᠦᠦᠰ ᠲᠠ ᠪᠦᠬᠦᠨ ᠳᠥ ᠪᠡᠨ ᠭᠤᠷᠪᠠᠨᠲᠠ ᠮᠡᠬᠦᠢᠢᠨ ᠶᠣᠰᠣᠯᠠᠶᠠ᠃
ᠴᠢᠨᠣᠰ ᠤᠳᠤᠮ ᠤᠨ ᠪᠠᠶᠠᠷᠮᠠᠩᠨᠠᠢ ᠣᠪᠤᠭ ᠲᠠᠢ ᠳᠠᠰᠢᠳᠣᠨᠳᠣᠭ ᠮᠢᠨᠦ ᠪᠡᠶᠡ ᠲᠠ ᠪᠦᠬᠦᠨ ᠳᠥ ᠪᠡᠨ ᠡᠪᠦᠯ ᠦᠨ ᠲᠡᠷᠢᠭᠦᠨ ᠰᠠᠷᠠ ᠢᠢᠨ ᠰᠢᠨᠡ ᠢᠢᠨ ᠨᠢᠭᠡᠨ ᠦ ᠪᠡᠯᠭᠡᠲᠦ ᠰᠠᠢᠢᠨ ᠡᠳᠦᠷ ᠢᠶᠡᠷ 《ᠾᠦ᠋》 ᠬᠠᠮᠲᠤᠯᠢᠭ ᠤᠨ ᠢᠶᠠᠨ ᠡᠷᠴᠢ ᠬᠦᠴᠦᠲᠡᠢ᠂ ᠡᠷᠡᠯᠬᠡᠭ᠌ ᠴᠣᠭᠯᠢᠭ ᠵᠠᠯᠠᠭᠤᠴᠤᠳ ᠪᠣᠯᠤᠨ ᠤᠳᠤᠮ ᠰᠤᠳᠤᠷᠲᠤ ᠠᠬᠠ ᠳᠡᠭᠦᠦᠰ ᠦᠨ ᠢᠶᠡᠨ ᠨᠡᠷᠡ ᠢᠢᠨ ᠡᠮᠦᠨᠡ ᠡᠴᠡ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠪᠠᠨ ᠮᠡᠯᠮᠡᠢ ᠭᠡᠢᠢᠭᠰᠡᠨ ᠮᠣᠩ᠋ᠭᠣᠯ ᠪᠢᠳᠡᠨ ᠦ ᠪᠠᠬᠠᠷᠬᠠᠯ ᠤᠨ ᠡᠳᠦᠷ ᠦᠨ ᠮᠡᠨᠳᠦ ᠢᠢ ᠬᠦᠷᠭᠡᠵᠦ᠂ ᠮᠡᠨᠳᠦᠴᠢᠯᠡᠵᠦ ᠪᠠᠢᠢᠭᠠ ᠢᠢ ᠮᠢᠨᠢ ᠲᠣᠭᠲᠠᠭᠠᠨ ᠰᠣᠶᠣᠷᠬᠠᠨᠠ ᠤᠤ᠃
ᠥᠯᠵᠡᠢ ᠤᠴᠠᠷᠠᠯᠳᠤ ᠪᠡᠯᠭᠡᠲᠦ ᠰᠠᠢᠢᠨ ᠡᠨᠡ ᠡᠳᠦᠷ ᠲᠥᠷᠥ ᠢᠢᠨ ᠰᠦᠯᠳᠡ᠂ ᠶᠢᠰᠦᠨ ᠬᠥᠯᠲᠦ ᠶᠡᠬᠡ ᠴᠠᠭᠠᠨ ᠲᠤᠭ ᠤᠨ ᠢᠶᠠᠨ ᠣᠷᠣᠰᠢᠬᠤᠢ ᠳᠣᠣᠷᠠ ᠮᠥᠩᠬᠡ ᠲᠩᠷᠢ ᠢᠢᠨ ᠲᠠᠰᠢᠭᠤᠷ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠪᠠᠨ ᠨᠡᠷᠡ ᠪᠡᠷ ᠠᠳᠢᠰᠯᠠᠭᠳᠠᠭᠰᠠᠨ ᠳᠡᠯᠡᠬᠡᠢ ᠳᠥ ᠴᠣᠷ ᠭᠠᠭᠴᠠ ᠡᠷᠬᠢᠮ ᠳᠡᠭᠡᠳᠦ ᠱᠠᠩᠨᠠᠯ ᠢ ᠬᠦᠷᠲᠡᠵᠦ᠂ 《ᠾᠦ᠋》 ᠬᠠᠮᠲᠤᠯᠢᠭ ᠤᠨ ᠢᠶᠠᠨ ᠨᠡᠷᠡ ᠢᠢᠨ ᠡᠮᠦᠨᠡ ᠡᠴᠡ ᠬᠦᠯᠢᠶᠡᠨ ᠠᠪᠴᠤ ᠪᠠᠢᠢᠭᠠ ᠳᠤ ᠪᠠᠨ ᠲᠤᠢᠢᠯ ᠤᠨ ᠪᠠᠶᠠᠷᠲᠠᠢ ᠪᠠᠢᠢᠨᠠ᠃ ᠶᠠᠭ ᠡᠨᠡ ᠲᠡᠦᠬᠡᠨ ᠮᠥᠴᠡ ᠳᠥ 《ᠾᠦ᠋》 ᠬᠠᠮᠲᠤᠯᠢᠭ ᠤᠨ ᠮᠠᠨᠢ ᠬᠥᠳᠡᠯᠮᠦᠷᠢᠴᠢ᠂ ᠠᠪᠢᠶᠠᠰᠯᠢᠭ᠂ ᠳᠠᠷᠠᠭᠤ ᠲᠥᠯᠥᠪ ᠵᠠᠯᠠᠭᠤᠰ ᠮᠠᠨᠢ ᠮᠣᠩ᠋ᠭᠣᠯ ᠤᠭᠰᠠᠭᠠᠲᠠᠨ ᠤ ᠴᠠᠭᠯᠠᠰᠢ ᠦᠭᠡᠢ ᠶᠡᠬᠡ ᠲᠡᠦᠬᠡ᠂ ᠥᠪ ᠰᠤᠶᠤᠯ᠂ ᠦᠨᠳᠦᠰᠦᠨ ᠦ ᠤᠷᠠᠯᠢᠭ᠂ ᠡᠬᠡ ᠰᠠᠢᠢᠬᠠᠨ ᠣᠷᠣᠨ ᠢᠶᠠᠨ ᠰᠤᠷᠲᠠᠯᠴᠢᠯᠠᠵᠤ᠂ ᠨᠡᠷᠡ ᠠᠯᠳᠠᠷ ᠢᠶᠠᠨ ᠴᠤᠤᠷᠢᠶᠠᠲᠤᠭᠤᠯᠤᠨ᠂ ᠳᠡᠯᠡᠬᠡᠢ ᠢᠢᠨ ᠦᠵᠡᠭᠴᠢᠳ ᠢ ᠳᠠᠭᠤᠤ ᠬᠤᠭᠤᠷ ᠢᠶᠠᠷ ᠢᠶᠠᠨ ᠪᠠᠢᠢᠯᠳᠤᠨ ᠳᠠᠭᠠᠭᠤᠯᠤᠭᠰᠠᠭᠠᠷ ᠪᠠᠢᠢᠨᠠ᠃
ᠡᠨᠡ ᠬᠦᠷᠲᠡᠯᠡ ᠪᠢᠳᠡ ᠭᠠᠭᠴᠠᠭᠠᠷ ᠢᠶᠠᠨ ᠪᠠᠢᠢᠭᠠ ᠦᠭᠡᠢ᠃ ᠬᠠᠢᠢᠷᠠᠲᠤ ᠬᠠᠨᠢ᠂ ᠭᠡᠷ ᠪᠦᠯᠢ᠂ ᠬᠠᠮᠲᠤᠯᠢᠭ ᠤᠨ ᠮᠧᠨᠧᠵᠧᠷ ᠦᠳ᠂ ᠨᠠᠢᠢᠵᠠ ᠨᠥᠬᠥᠳ ᠭᠡᠳ ᠬᠦᠴᠦ ᠬᠥᠳᠡᠯᠮᠦᠷᠢ᠂ ᠬᠦᠮᠦᠯᠢᠭ ᠰᠡᠳᠬᠢᠯ᠂ ᠲᠤᠰ ᠳᠡᠮ ᠢᠶᠡᠷ ᠢᠶᠡᠨ ᠡᠨᠡ ᠠᠮᠵᠢᠯᠲᠠ ᠢᠢ ᠬᠠᠮᠲᠤ ᠳᠤ ᠪᠠᠨ ᠪᠦᠲᠦᠭᠡᠭ᠍ᠰᠡᠨ ᠬᠦᠮᠦᠨ ᠨᠢᠭᠡ ᠪᠦᠷᠢ ᠳᠥ ᠭᠦᠨ ᠲᠠᠯᠠᠷᠬᠠᠯ ᠢᠶᠠᠨ ᠢᠯᠡᠷᠬᠡᠢᠢᠯᠡᠵᠦ ᠪᠠᠢᠢᠭᠠ ᠢᠢ ᠮᠢᠨᠢ ᠬᠦᠯᠢᠶᠡᠨ ᠠᠪᠤᠨᠠ ᠤᠤ᠃ ᠭᠠᠷᠳᠠᠬᠤ ᠢᠢ ᠨᠢ ᠪᠢ ᠭᠠᠷᠳᠠᠪᠠᠴᠤ᠂ ᠭᠠᠪᠢᠶᠠ ᠢᠢ ᠨᠢ ᠲᠠ ᠪᠦᠬᠦᠨ ᠬᠠᠮᠲᠤ ᠳᠤ ᠪᠠᠨ ᠬᠦᠷᠲᠡᠬᠦ ᠶᠣᠰᠣᠲᠠᠢ ᠶᠤᠮ ᠰᠢᠦ᠃
ᠶᠡᠬᠡ ᠴᠠᠳᠢᠭᠲᠤ ᠡᠪᠦᠭᠡᠳ ᠦᠨ ᠢᠶᠡᠨ ᠲᠡᠦᠬᠡ ᠦᠭᠡᠢ ᠪᠡᠷ ᠪᠢᠳᠡ ᠬᠡᠨ ᠰᠡᠨ ᠪᠢᠯᠡ?
ᠶᠡᠬᠡ ᠣᠶᠤᠨᠳᠤ ᠡᠪᠦᠭᠡᠳ ᠦᠨ ᠢᠶᠡᠨ ᠦᠨᠡᠨ ᠰᠤᠷᠭᠠᠯ ᠦᠭᠡᠢ ᠪᠡᠷ ᠪᠢᠳᠡ ᠪᠠᠰᠠ ᠬᠡᠨ ᠰᠡᠨ ᠪᠢᠯᠡ?
ᠥᠨᠥ ᠢᠢᠨ ᠳᠡᠯᠡᠬᠡᠢ ᠳᠠᠬᠢᠨ ᠤ ᠰᠤᠶᠤᠯ ᠢᠷᠭᠡᠨᠰᠢᠯ ᠦᠨ ᠦᠨᠳᠦᠰᠦ ᠰᠠᠭᠤᠷᠢ ᠪᠣᠯᠤᠭᠰᠠᠨ ᠲᠥᠷᠥᠳᠥ ᠤᠯᠤᠰ᠂ ᠬᠠᠤᠯᠢ ᠴᠠᠭᠠᠵᠠ᠂ ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ᠂ ᠰᠢᠤᠳᠠᠨ ᠬᠣᠯᠪᠣᠭᠠ᠂ ᠭᠦᠷᠦᠨ ᠳᠠᠮᠵᠢᠨ ᠵᠣᠷᠴᠢᠬᠤ ᠠᠯᠲᠠᠨ ᠭᠡᠷᠡᠭᠡ᠂ ᠰᠤᠶᠤᠯ ᠤᠨ ᠥᠪ ᠪᠣᠯᠤᠭᠰᠠᠨ ᠠᠩᠬᠠᠨ ᠤ ᠨᠠᠢᠢᠷᠠᠯ ᠬᠥᠭ᠍ᠵᠢᠮ ᠵᠡᠷᠭᠡ ᠤᠯᠤᠰ ᠣᠷᠣᠨ ᠨᠤᠭᠤᠳ ᠤᠨ ᠣᠷᠣᠰᠢᠨ ᠲᠣᠭᠲᠠᠨᠢᠯ᠂ ᠪᠦᠷᠢᠨ ᠡᠷᠬᠡ ᠢᠢᠨ ᠪᠠᠲᠤᠯᠠᠭᠠ ᠪᠣᠯᠤᠭᠰᠠᠨ ᠦᠨᠳᠦᠰᠦ ᠰᠠᠭᠤᠷᠢ ᠭᠡᠳ ᠣᠯᠠᠨ ᠵᠦᠢᠯᠡᠰ ᠢ ᠪᠢᠳᠡᠨ ᠦ ᠡᠪᠦᠭᠡ ᠳᠡᠭᠡᠳᠦᠰ᠂ ᠮᠣᠩ᠋ᠭᠣᠯᠴᠤᠳ ᠪᠢᠳᠡ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠳᠥ ᠨᠡᠭᠡᠭᠡᠨ ᠥᠭ᠍ᠭᠦᠭ᠍ᠰᠡᠨ ᠪᠢᠯᠡ᠃
ᠪᠢᠳᠡ ᠡᠪ ᠡᠶᠡ ᠢᠢ ᠬᠢᠴᠢᠶᠡᠵᠦ᠂ ᠡᠪᠯᠡᠯᠳᠦᠨ ᠨᠢᠭᠡᠳᠴᠦ ᠴᠢᠳᠠᠪᠠᠰᠤ ᠡᠪᠦᠭᠡ ᠳᠡᠭᠡᠳᠦᠰ ᠰᠢᠭ᠌ ᠢᠶᠡᠨ ᠣᠶᠤᠨ ᠰᠠᠨᠠᠭᠠ ᠪᠠᠷ ᠬᠦᠴᠦᠷᠬᠡᠭ᠌ ᠤᠯᠤᠰ ᠭᠦᠷᠦᠨ ᠢ ᠳᠠᠬᠢᠨ ᠴᠣᠭᠴᠠᠯᠠᠭᠠᠵᠤ ᠴᠢᠳᠠᠨᠠ ᠭᠡᠵᠦ ᠪᠢ ᠪᠣᠳᠣᠳᠠᠭ᠃
ᠲᠣᠭᠣᠷᠢᠭᠠᠳ ᠭᠠᠷᠬᠤ ᠦᠭᠡᠢ᠂ ᠲᠤᠭᠤᠯᠤᠭᠠᠳ ᠥᠩᠭᠡᠷᠡᠬᠦ ᠡᠨᠡ ᠪᠣᠭᠣᠨᠢᠬᠠᠨ ᠠᠮᠢᠳᠤᠷᠠᠯ ᠳᠤ ᠪᠠᠨ ᠢᠷᠡᠭᠡᠳᠦᠢ ᠬᠣᠢᠢᠴᠢ ᠦᠶᠡ ᠢᠢᠨ ᠢᠶᠡᠨ ᠲᠥᠯᠥᠭᠡ ᠴᠢᠳᠠᠬᠤ ᠪᠦᠬᠦᠨ ᠢᠶᠡᠨ ᠬᠢᠭᠡᠳ᠂ ᠡᠪᠦᠭᠡ ᠳᠡᠭᠡᠳᠦᠰ ᠦᠨ ᠢᠶᠡᠨ ᠦᠢᠯᠡ ᠬᠡᠷᠡᠭ᠂ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠢ ᠨᠢ ᠪᠠᠭᠠ ᠴᠤ ᠪᠣᠯᠲᠤᠭᠠᠢ ᠤᠷᠤᠭᠰᠢᠯᠠᠭᠤᠯᠬᠤ ᠢᠢᠨ ᠲᠥᠯᠥᠭᠡ ᠪᠢᠳᠡ ᠠᠮᠢᠳᠤᠷᠠᠬᠤ ᠶᠣᠰᠣᠲᠠᠢ᠃
ᠪᠢ ᠲᠠ ᠪᠦᠬᠦᠨ ᠳᠥ ᠪᠡᠨ ᠡᠨᠡ ᠴᠠᠭ ᠳᠣᠣᠷᠠ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠪᠢᠯᠢᠭᠲᠥ ᠰᠤᠷᠭᠠᠯ ᠠᠴᠠ ᠥᠪᠡᠷ ᠦᠨ ᠬᠡᠯᠡᠬᠦ ᠳᠤᠷᠠᠲᠠᠢ ᠨᠢᠭᠡᠨ ᠡᠰᠢᠯᠡᠯ ᠢ ᠬᠡᠯᠡᠬᠦ ᠢᠢ ᠬᠦᠰᠡᠵᠦ ᠪᠠᠢᠢᠨᠠ᠃
《ᠣᠯᠠᠨ ᠣᠮᠤᠭ ᠠᠢᠢᠮᠠᠭ ᠤᠨ ᠬᠦᠮᠦᠰ ᠴᠤᠬᠤᠮ ᠶᠠᠭᠤ ᠪᠣᠳᠣᠵᠤ ᠬᠦᠰᠡᠵᠦ ᠪᠠᠢᠢᠭᠠ ᠢᠢ ᠣᠯᠵᠤ ᠮᠡᠳᠡᠬᠦ ᠢᠢ ᠬᠢᠴᠢᠶᠡᠭᠲᠦᠨ᠃ ᠶᠠᠭᠤ ᠬᠦᠰᠡᠵᠦ ᠪᠠᠢᠢᠭᠠ ᠢᠢ ᠨᠢ ᠮᠡᠳᠡᠬᠦ ᠦᠭᠡᠢ ᠪᠡᠷ ᠲᠡᠳᠡᠨ ᠢ ᠳᠠᠭᠠᠭᠤᠯᠤᠨ ᠲᠡᠷᠢᠭᠦᠯᠡᠨᠡ ᠭᠡᠵᠦ ᠦᠭᠡᠢ᠃ ᠥᠴᠥᠭᠡᠳᠦᠷ ᠶᠡᠬᠡ ᠰᠠᠭᠤᠷᠢᠨ ᠳᠤ ᠰᠠᠭᠤᠮᠠᠭᠴᠠ᠂ ᠥᠨᠥᠳᠥᠷ ᠤᠯᠤᠰ ᠤᠨ ᠬᠡᠷᠡᠭ ᠢ ᠣᠷᠬᠢᠵᠤ᠂ ᠪᠡᠶᠡ ᠢᠢᠨ ᠵᠢᠷᠭᠠᠯ ᠢ ᠡᠷᠢᠪᠡᠰᠦ ᠡᠨᠡ ᠦᠶᠡ ᠳᠡᠭᠡᠨ ᠪᠣᠯ ᠲᠥᠷᠥ ᠢᠢᠨ ᠶᠣᠰᠣᠨ ᠳᠤ ᠬᠠᠷᠰᠢ᠂ ᠡᠴᠦᠰ ᠬᠣᠢᠢᠲᠤ ᠳᠤ ᠪᠠᠨ ᠪᠣᠯ ᠦᠷᠡ ᠠᠴᠢ᠂ ᠵᠠᠯᠭᠠᠮᠵᠢᠯᠠᠭᠴᠢ ᠨᠠᠷ ᠲᠤ ᠮᠠᠭᠤ ᠰᠤᠷᠲᠠᠯ ᠢ ᠦᠯᠡᠳᠡᠭᠡᠬᠦ ᠭᠡᠮ ᠲᠡᠢ》 ᠭᠡᠵᠦ ᠠᠢᠢᠯᠠᠳᠤᠭᠰᠠᠨ ᠰᠤᠤᠲᠤ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ ᠮᠡᠷᠭᠡᠨ ᠰᠤᠷᠭᠠᠯ᠂ ᠦᠭᠡ ᠪᠦᠷᠢ ᠴᠠᠭ ᠡᠯᠡᠭᠡᠬᠦ ᠲᠤᠲᠤᠮ ᠠᠮᠢᠳᠤ ᠪᠠᠢᠢᠵᠤ᠂ ᠦᠨᠡᠨ ᠢ ᠰᠤᠷᠭᠠᠭᠰᠠᠭᠠᠷ᠂ ᠠᠮᠢᠳᠤ ᠵᠠᠷᠯᠢᠭ ᠨᠢ ᠠᠯᠲᠠ ᠠᠴᠠ ᠴᠤ ᠦᠨᠡ ᠲᠡᠢ ᠪᠣᠯᠬᠤ ᠢᠢ ᠤᠬᠠᠭᠠᠷᠠᠵᠤ ᠪᠠᠢᠢᠭᠠ ᠪᠠᠨ ᠬᠡᠯᠡᠬᠦ ᠨᠢ ᠵᠦᠢᠲᠡᠢ ᠪᠠᠢᠢᠬᠤ᠃
ᠵᠢᠯ ᠪᠦᠷᠢ ᠢᠢᠨ ᠡᠨᠡ ᠴᠠᠭ ᠳᠣᠣᠷᠠ ᠡᠵᠡᠨ ᠬᠠᠭᠠᠨ ᠤ ᠪᠠᠨ ᠰᠤᠷᠭᠠᠯ ᠵᠠᠷᠯᠢᠭ ᠢ ᠬᠡᠯᠡᠯᠴᠡᠵᠦ᠂ ᠦᠷᠡ ᠬᠣᠢᠢᠴᠢᠰ ᠲᠤ ᠪᠠᠨ ᠵᠠᠬᠢᠨ ᠦᠯᠡᠳᠡᠭᠡᠵᠦ ᠪᠠᠢᠢᠬᠤ ᠰᠠᠨᠠᠭᠠᠴᠢᠯᠠᠭᠠ ᠢᠢ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠮᠡᠨᠳᠦᠯᠡᠭᠰᠡᠨ ᠡᠨᠡ ᠡᠳᠦᠷ᠂ ᠪᠣᠭᠳᠠ ᠳᠡᠭᠡᠳᠦᠰ ᠦᠨ ᠢᠶᠡᠨ ᠥᠨᠳᠥᠷ ᠶᠡᠬᠡ ᠠᠯᠳᠠᠷ ᠢᠶᠠᠷ ᠰᠣᠶᠣᠷᠬᠠᠭᠰᠠᠨ᠂ ᠮᠣᠩ᠋ᠭᠣᠯ ᠲᠥᠷᠥ ᠢᠢᠨ ᠲᠡᠷᠢᠭᠦᠨ ᠡᠷᠬᠢᠮ ᠳᠡᠭᠡᠳᠦ ᠣᠳᠣᠨ ᠢ ᠤᠯᠤᠰ ᠤᠨ ᠢᠶᠠᠨ ᠲᠥᠷᠥ ᠢᠢᠨ ᠲᠡᠷᠢᠭᠦᠨ ᠡᠴᠡ ᠭᠠᠷᠳᠠᠨ ᠠᠪᠤᠭᠰᠠᠨ ᠡᠨᠡ ᠴᠠᠭ ᠮᠥᠴᠡ ᠳᠥ ᠮᠢᠨᠦ ᠪᠡᠶᠡ ᠭᠠᠷᠭᠠᠵᠤ ᠪᠠᠢᠢᠨᠠ᠃
ᠬᠥᠷᠥᠰᠥᠳᠥ ᠳᠡᠯᠡᠬᠡᠢ ᠳᠥ ᠳᠡᠭᠡᠳᠦ ᠬᠥᠬᠡ ᠲᠩᠷᠢ ᠢᠢᠨ ᠳᠣᠣᠷᠠ
ᠬᠦᠴᠦᠷᠬᠡᠭ᠌ ᠪᠣᠯᠬᠤ ᠢᠢ ᠳᠠᠬᠢᠨ ᠬᠠᠷᠠᠭᠤᠯᠤᠨ
ᠡᠪᠦᠭᠡ ᠳᠡᠭᠡᠳᠦᠰ ᠦᠨ ᠢᠶᠡᠨ ᠦᠵᠡᠯ ᠰᠠᠨᠠᠭᠠ
ᠥᠪ ᠰᠤᠶᠤᠯ ᠣᠶᠤᠨ ᠢ ᠳᠠᠬᠢᠨ ᠮᠠᠨᠳᠤᠭᠤᠯᠬᠤ ᠢᠢᠨ ᠲᠥᠯᠥᠭᠡ ᠪᠦᠬᠦ ᠬᠦᠴᠦ ᠪᠡᠨ ᠵᠣᠷᠢᠭᠤᠯᠤᠨ
ᠬᠣᠢᠢᠴᠢ ᠦᠶᠡ ᠳᠡᠭᠡᠨ ᠬᠦᠴᠦᠷᠬᠡᠭ᠌ ᠮᠣᠩ᠋ᠭᠣᠯ ᠢᠶᠠᠨ ᠤᠯᠠᠮᠵᠢᠯᠠᠭᠤᠯᠤᠨ ᠦᠯᠡᠳᠡᠭᠡᠵᠦ᠂ ᠤᠬᠠᠭᠤᠯᠤᠨ ᠰᠡᠷᠭᠦᠭᠡᠵᠦ ᠶᠠᠪᠤᠬᠤ ᠪᠠᠨ ᠲᠥᠷᠥ ᠢᠢᠨ ᠰᠦᠯᠳᠡ᠂ ᠶᠢᠰᠦᠨ ᠬᠥᠯᠲᠦ ᠶᠡᠬᠡ ᠴᠠᠭᠠᠨ ᠲᠤᠭ ᠤᠨ ᠢᠶᠠᠨ ᠡᠮᠦᠨᠡ ᠠᠮᠠᠯᠠᠨ ᠲᠠᠩᠭᠠᠷᠢᠭᠯᠠᠶᠠ᠃
ᠮᠥᠩᠬᠡ ᠲᠩᠷᠢ ᠪᠢᠳᠡᠨ ᠢ ᠢᠪᠡᠭᠡᠭ᠌》 ᠭᠡᠯᠡ᠃
