СОНГУУЛИЙН ТУХАЙ ХУУЛЬД НЭМЭЛТ, ӨӨРЧЛӨЛТ ОРУУЛАХ ХУУЛИЙН ТӨСӨЛ
Монгол Улсын Ерөнхийлөгч хүний эрх, эрх чөлөөг хангахуйц эдийн засаг, нийгэм, хууль зүйн болон бусад баталгааг бүрдүүлэх төрийн үүрэг, засгийн бүх эрх ард түмний мэдэлд байх Үндсэн хуулийн үзэл санаа, зарчмын хүрээнд шууд буюу төлөөлөгчдийн байгууллагаараа уламжлан төрийг удирдах хэрэгт оролцох, төрийн байгууллагад сонгох, сонгогдох иргэний үндсэн эрх, эрх чөлөөг аливаа нөлөөллөөс ангид, хараат бусаар хэрэгжүүлэх шаардлагатай байгааг харгалзан энхүү хуулийн төслийг санаачилж байна.
Монгол Улсын иргэн хууль бус хөндлөнгийн нөлөөлөл, дарамт, шахалтгүйгээр сонгох болон сонгогдох эрхээ эдлэх ёстойг “төрийн эрх мэдлийг хууль бусаар авах, авахаар завдахыг хориглоно” гэсэн Үндсэн хуулийн зохицуулалт бүрэн илэрхийлж, баталгаажуулдаг бөгөөд иргэд, сонгогчдын саналыг худалдан авах шинж бүхий аливаа үйлдэл нь төрийн эрх мэдлийг хууль бусаар авах санаархал бүхий үйл ажиллагаа мөн юм.
Монгол Улсын Их Хурлаас 2015 оны 12 дугаар сарын 25-ны өдөр баталсан Сонгуулийн тухай хууль хэрэгжиж эхлэснээр иргэд, сонгогчдын саналыг худалдан авах шинж бүхий аливаа үйлдэл, үйл ажиллагааг сонгуулийн жил эхэлснээр болон сонгуулийн сурталчилгааны явцад хориглож, тодорхой хэмжээнд ахиц дэвшил гаргасан гэж үзэж болно. Гэвч сонгуулийн бус жилд иргэний дэмжлэгийг олж авах, түүгээрээ дамжуулан сонгох эрхэд нь нөлөөлж, сонгуулийн үеэр саналыг нь татах зорилготой мөнгө, эд зүйл, бэлэг, сэлт тараах, аливаа хэлбэрийн тусламж, үйлчилгээ үзүүлэх зүй бус үйл ажиллагаа тасралтгүй явагдсаар байна.
Хөрөнгийн чадавхи, албан тушаалын давуу байдлаа ашиглан иргэд, сонгогчдод мөнгө, эд зүйл, бэлэг, сэлт тараах, аливаа хэлбэрийн тусламж, үйлчилгээ үзүүлэх замаар нөлөөлөн, санал, дэмжлэгийг татдаг хууль бус үйл ажиллагааг таслан зогсоох нь зүй ёсны шаардлага бөгөөд энэ нь хуулийн төсөл боловсруулах гол үндэслэл болж байна.
Та хуулийн төсөл болон үзэл баримтлал, танилцуулга, материалтай танилцан судалж, санал, зөвлөмжөө tusul@president.mn хаягаар ирүүлнэ үү.